Institucion publico ta e fundamento di un sociedad cu ta funciona. Nan ta actua como ‘watchdog’ pa mantene ley, provee cierto servicio esencial, y hopi biaha ta actua pa proteha derecho di ciudadano. Sin embargo, ora e institucionnan aki desvia di cuadro legal, esaki ta mina confianza publico y ta perhudica mantencion di ley. Un asunto reciente cu Camara di Comercio (KvK) encuanto cobro pa acceso online pa Registro Comercial y algun cobro adicional pa cierto servicio ta ehemplo di e problema aki. Aki ta explora e complehidad alrededor di e problemanan aki, ta haci escrutinio encuanto e requisitonan estatutario pa un base legal adecua, ta subraya e importancia di adherencia na requisito estatutario y ta provee algun sugerencia pa pasonan necesario pa un solucion. Mientras a atende e preocupacion y analisis legal cu Camara di Comercio, e discusion aki no mester ta tras di porta cera.

KvK a anuncia recientemente restriccion di acceso publico na e registro comercial online, y a introduci un modelo di “pay-to-play”, a base di abonado. A introduci un structura di tarifa cu un pago di Afl. 1.200 pa aña o Afl. 300,- pa kwartaal, pa acceso online na e registro comercial. “KvK por restringi acceso online pa publico na e registro online? Talvez esaki ta yama un siguiente pregunta: KvK tin e base legal pa impone un tarifa anual di Afl. 1.200,- pa aña o Afl. 300,- pa kwartaal? Si e contesta na e segundo pregunta ta no, anto e contesta na e promer pregunta ta bira irelevante, te ora crea un base legal. Te na e momento ey, KvK mester, segun mi opinion, habri e acceso online atrobe.”

E base legal aki ta cu Camara di Comercio ta un entidad publico, estableci a base di e Ordenanza Nacional encuanto Camara di Comercio. Mientras un di obhetivonan di e Camara ta pa duna proteccion na interes di empresa priva, e Camara mes no ta un compania priva y no por actua di e mesun manera agil cu talvez un negoshi priva den un mercado habri por. KvK mester sigui e reglanan general, estableci pa legislacion aplicable. Un aspecto ta cu KvK ta mara na impone pago y colecta placa, cu ta requeri un base legal claro. KvK por cobra publico, cu un base legal specifico. “Mi ta kere cu KvK ta carece di e autoridad legal pa cobra e tasa anual di Afl. 1200 pa aña o Afl. 300 pa kwartaal pa acceso online.”

“Otro asunto ta cu KvK ta cobra mas tambe pa extracto na Ingles. Mientras nos por aprecia e servicio extra, KvK ta mara na ley y no por aplica e pagonan mas halto aki, por ehemplo, KvK no por cobra un suma mas halto cu Afl. 15 pa un extracto na Ingles di Registro Comercial.” E reto legal aki ta e interpretacion di varios articulo di e ‘Handelsregisterbesluit’ (decreto a base di e Ordenanza encuanto Registro Comercial) y e Ordenanza encuanto KvK pa determina e legalidad di e cobronan aki. Articulo 17 di Handelsregisterbesluit ta stipula cu cualkier cobranza mester ta regula den un decreto gubernamental specifico (lbham). Sin un decreto asina, KvK ta carece di autoridad pa cobra tal pago. Di acuerdo cu articulo 19 di e Handelsregisterbesluit, tin un base estatutario pa provee un extracto di Registro Comercial. E articulo aki ta bisa cu tal extracto ta ser provei contra pago di Afl. 15. E articulo no ta distingui idioma, ni mandato cu extracto por ta solamente na Hulandes. Ya cu articulo 19 no ta duna otro suma cu Afl. 15 pa un extracto, KvK ta carece di autoridad legal pa cobra Afl. 30 pa un extracto na Ingles. Ya cu articulo 19 no ta duna posibilidad di cobra pa acceso online, no por cobra esaki di publico.

“Den mi discusion cu KvK, y mi ta contento cu nos por tin e discusionnan aki, KvK a referi na articulo 13, inciso 1 e, di e Ordenanza encuanto KvK pa hustifica provee un servicio adicional y cobra anto tarifa mas halto. Sin embargo, e argumento aki ta problematico pa varios motibo. Pa cuminza, no ta claro pakico por cobra un tarifa mas halto bao di articulo 13, inciso 1 e, si articulo 19 di Handelsregisterbesluit ta limita e tarifa na Afl. 15. Retribucion, manera menciona den articulo 13 inciso 1 e, por cobra solamente basa riba LV Retributies (Ordenanza encuanto Retribucion) y un lbham specifico. No tin un lbham pa KvK, cu ta provee un base legal pa tal cobranza.”

Handelsregisterverordening (Ordenanza Registro Comercial) ta permiti solamente cobra pa e registracion inicial y e contribucion anual di e empresa/organisacion incribi (articulo 15). E Handelsregisterbesluit, ta permiti solamente cobra Afl. 15 pa (cualkier) extracto. Cualkier cambio di e sumanan aki mester tuma lugar via un lbham. Cobranza pa servicio online mester ta menciona den Handelsregisterverordening, Handelsregisterbesluit, o LV KvK. Ausencia di tal ta indica un falta di fundamento legal pa e cobranzanan aki.

E Principio: Fin no ta hustifica medio

Den termino legal y etico, e principio “the end justifies the means” no ta aplicable, especialmente ora institucion publico ta envolvi. Entidad priva generalmente por cobra loke nan ta desea pa producto y servicio. Mientras necesidad moderno manera acceso online y servicio adicional ta ocasiona costo, mester maneha esaki dentro di e cuadro legal apropia. Ausencia di un base legal claro pa e accionnan di KvK ta sugeri cu e practicanan aki no ta legal, irespecto nan beneficio practico.

E implicacionnan financiero di e cobronan no hustifica aki ta significativo. Pago haci pa entidad legal y individuo sin base legal, por ser considera indebidamente paga y por ta suheto na devolucion. Hopi partido afecta lo tin derecho di reclama e pagonann aki, un potencial riesgo financiero pa KvK, y urgiendo KvK pa adheri estrictamente na stipulacion legal. Pa rectifica e situacion aki, ta recomendable pa KvK considera: busca coseho legal externo; inicia e proceso legal pa yega na legislacion debido; restaura acceso opublico online; debolbe e sumanan adquiri cu e tasa imponi; anuncia Afl. 15 como tarifa unico pa extracto. Tur esaki como medida pa restaura confianza publico pa e entidad. Mas a largo plazo por considera ‘audit’ legal regular, pa sigura cu ta den cumplimento cu legislacion relevante. Training pa personal encuanto requisito legal por reduci posible desviacion di regulacion exxistente. Mas envolvimento di ‘stakeholders’ incluyendo gobierno, sector priva y publico en general pa sigura cu loke ta proyecta ta cuadra cu expectativa publico y standardnan legal.

E caso aki ta enfatiza e importancia di cumplimento cu ley den servicio publico. Mantene ley no ta djis un cuestion di principio sino tambe un necesidad pa funcionamento apropia di comunidad. Institucion publico mester opera dentro di cuadro legal pa mantene confianza y sigura practica husto. Paso proactivo di KvK pa rectifica e situacion actual y preveni asunto similar den futuro por reforza integridad di nos sistema legal y demostra un compromiso cu bon gobernacion. Entidad publico cumpliendo cu ley ta un responsabilidad comparti. Tumando e accionnan necesario, KvK por establece un ehemplo positivo y mantene ley, beneficiando tur interesado envolvi.

E articulo aki ta resumen di un articulo mas extenso di mr. Delo Gomez, publica na Ingles riba LinkedIn. Traduccion y redaccion: Bon Dia Aruba.