Parlamentario Marisol Lopez ta reacciona riba rapport di ARA: “Gobierno ta gasta fondonan publico na un manera ineficiente, ineficaz y ilegitimo”

Mediante un publicacion riba su pagina di Facebook, parlamentario y lider di fraccion MAS, Marisol Lopez, a reacciona ariba e rapport cu Algemene Rekenkamer Aruba (ARA) a presenta recientemente tocante e funcionamento di instancianan cu a wordo independisa for di gobierno, instancianan na distancia.

Lopez ta expresa cu si mira e companianan estatal un pa un, por mira cu no ta por nada, por ehempel, Serlimar na aña 2020 mester a haya un ‘surseance van betaling’. Hues e tempo ey a duna aprobacion pa haya esaki y asina duna Serlimar un rosea y tempo pa drecha su mes paden financieramente y por cumpli cu su obligacionnan.

E parlamentario a señala cu instancianan asina ta un risico financiero grandi pa pais Aruba pasobra tempo cu a institui e instancianan e meta no tabata pa nan bira algo cu gobierno continuamente mester keda hinca placa structuralmente den nan.

“Nan mester a bira mas autonomo, financieramente para riba nan mesun pia y hasta haci ganashi. Pero loke nos ta mira awor aki ta net contrario y hasta tin di nan ta practicamente failliet,” el a remarca.

Tromp a sigui bisa cu aworaki ainda por mira cu tin metemento politico hasta den nombramento di personal den diferente di e instancianan aki cual a conduci tambe na e problemanan cu a bin despues.

“No ta por nada ta haci e investigacionnan aki. Cosnan a bay robes y ta trata placa di pagadornan di belasting ora cu un gobierno ta keda hinca placa cada bes den instancianan asina pa nan por sobrevivi. Si esaki no tuma luga hopi di e instancianan aki lo no por paga nan trahadornan fin di luna! Serlimar ta un ehempel clave di e situacion aki ya cu nan a casi bati bancarota y mester a pidi un ‘surseance van betaling’. Y asina mes no ta asina cu e peligernan a kita,” el a resalta,

E parlamentario ta señala cu loke ARA a pidi den su rapport aworaki ta decisionnan structural pa asina tin miho supervision di loke tin actualmente. El a splica cu loke cu algun gobierno a bin ta haci, cual ainda ta tuma luga segun el a indica, ta cu den cierto di e entidadnan aki gobierno ta pone campañador- y votadornan cu no necesariamente tin e cualidadnan rekeri segun e perfil pa e institutonan aki.

“Loke nos por constata ta cu hasta den esaki Rekenkamer ta bisa cu e mester wordo haci mucho mas fuerte y mucho mas miho,” el a finalisa.