(EFE) – Presidente di Mexico, Andres Manuel Lopez Obrador, a considera “un bon noticia” e programa nobo cu Merca a anuncia ayera pa regularisa indocumentadonan casa cu Mericano y nan yiu, loke ta bay beneficia mas di mey miyon migrante.

“Ta hopi bon noticia cu ta bay regularisa famianan Mexicano na Merca, vooral studiantenan, hobennan, ta digno di reconocemento cu presidente Biden ta actua di e forma aki,” e mandatario a manifesta.

E gobernante Mexicano a celebra e alivio migratorio nobo, un di e mayor for di momento cu Administracion di Barack Obama na 2012 a crea Accion Diferi pa esnan den Infancia (DACA), cu e cual mas di 800.000 migrante a haya permisonan di trabou y proteccion di deportacion.

E politicanan nobo, anuncia cinco luna atras prome cu eleccion den cual migracion ta e topico central, ta bay tarda lunanan pa drenta na vigor y ta bay concede na migrantenan e prome paso so pa haya un permiso di residencia na Merca, loke por ser prolonga pa añanan.

Pero Lopez Obrador a opina cu “esaki, cu ta parcial ainda, ta un avance caba.”

Pa solicita permiso, cu un validez di tres aña, e persona mester ta casa cu un ciudadano Mericano prome cu 17 di juni 2024 y tambe mester a biba na e pais menos cu 10 aña, ademas nan yiu menor di 21 aña sin status legal tambe por haya e permiso.

Lopez Obrador a recorda cu su gobierno “ta bin insistiendo den regularisacion di Mexicanonan cu tin añanan trahando na Merca y nan no a haya husticia.”

Tambe a destaca e politica migratorio di Biden, manera e programa pa duna visa y asilo na ciudadanonan di Haiti, Nicaragua y Venezuela, ademas di ta e prome presidente di Merca, segun el a bisa, cu no ta construi un muraya fronteriso.

El a recorda cu den un yamada di ambos e mandatario Mericano a anuncia dia 4 di juni e construccion di un brug fronteriso na Matamoros, na estado di Tamaulipas y na Piedras Negras, Cohauila, ademas di amplia e brug “Comercio Mundial” di Nuevo Laredo, na unda 40% di comercio binacional ta pasa.

E politica di Biden ta bay ofrece un apoyo cu famianan tabatin hopi tempo wardando, incluyendo esnan di Florida. Ta dificil pa conta cuanto famia cu tin status mixto ta bay beneficia cu e anuncio di ayera.

Florida Policy Institute (FPI) un grupo di investigacion independiente, a calcula cu casi 130.000 indocumentado ta casa cu ciudadano Mericano na Florida. Mientras tanto, Conseho di Inmigracion Mericano a calcula cu casi 600.000 ciudadano Mericano na Florida ta biba cu por lo menos un familiar indocumenta, incluyendo 8% di e yiunan di ciudadanonan Mericano di estado aki.

Contrario na loke ta e creencia popular, matrimonio cu un ciudadano Mericano no ta un caminda sigur pa migrantenan indocumenta por haya residencia permanente of por haya e nacionalisacion. Como parti di e proceso di solicitud di carchi berde, hopi di e personanan mester bandona Merca, pero bin back tampoco ta un garantia, hopi di nan no kier pone den riesgo nan mes di ser separa di nan pareha y yiunan Mericano y ta opta, na cambio, pa sigui biba sin status legal.