Primeramente, e votacion tabata pa awe mainta, pero presidente di Parlamento di Aruba, Edgard Vrolijk a anuncia mediante un carta cu a cambia e fecha di reunion publico pa mañan 2or di atardi.

Mañan, Parlamento di Aruba ta bay tin e di dos oportunidad pa introduci e ley di matrimonio pa parehanan di mesun sexo caminda e ultimo votacion y tratamento di e proposicion di e ley a tuma luga dia 8 di mei ultimo unda e votacion a keda empata cu 10 voto na fabor y 10 en contra.

Por a recorda cu pa algun parlamentario e reunion publico aki tabata uno hopi emocional unda por ehemplo, parlamentario Setty Yarzagaray, tabata e unico miembro di partido MEP cu a vota na fabor di e ley aki. El a habri su mes na e topico y a splica cu den esaki mester prepara comunidad pa e transformacion aki, mirando cu ta un topico hopi dificil no solamente pa comunidad pero cu nan ta sintiel’e tambe den nan mesun fraccion “pa hopi biaha nos ta traha riba un linea y esaki un tipo di ley, cu tur sinceridad cu nos no ta wak otro riba e mesun linea.”

Parlamentario cu a dicidi di sali for di reunion y abstene su mes di vota tabata Shailiny Tromp-Lee ken a sigura cu esaki tabata un “decision hopi dificil” pa su persona, ademas el a skirbi riba su rednan social cu “mi no ta sinti ta na ami pa dicidi ken si of ken no. No ta na ami pa stroba felicidad di otro. Ken ami ta pa husga amor? Ami ta convenci cu mi Dios ta un Dios di amor. Mi dilema ta grandi y mi debate interno ta fuerte. Den mi trayectoria di bida ami semper tin mi opinion, por argument’e y present’e. Hecho ta, cu pa e topico aki esey ainda no ta e caso.”

Misha Rymond, di partido Raiz a señala cu el a hiba un lucha fuerte pa esaki y cu ademas cu e topico no ta facil “nos tin cu demostra kico e desaroyo aki por nifica na esnan cu nos ta stima mas,” el a bisa.

E dia ey, 8 di mei tabatin diferencianan di opinion entre parlamentarionan y pa e motibo ey no a logra ni e votonan necesario of den otro caso, cu e ley no lo ser aproba.

A splica cu diferente argumento cu no tin motibo valido pa warda riba casacion, y cu tin un balor agrega pa Parlamento expresa su decision democratico.

Finalmente, mañan ta bay ta e dia cu parlamentarionan di Aruba mes lo dicidi ki caminda e ley aki lo tuma.