(AP) – Ciruhano General di Merca a haci un yamado na Congreso pa rekeri label di advertencia riba plataforma di rednan social y nan efectonan riba hende hoben su bida, similar na esnan cu ta obligatorio riba caha di sigaria.
Den un publicacion riba pagina di opinion den New York Times, Dr. Vivek Murthy a bisa cu rednan social ta un factor cu ta contribui na e crisis di salud mental entre hobennan.
“E ta tempo pa rekeri un dokter su label di advertencia riba plataformanan di rednan social, declarando cu rednan social ta asocia cu dañonan significante di salud mental pa adolescentenan. Un ciruhano general su advertencia, cual ta rekeri accion di Congreso, lo regularmente recorda mayornan y adolescentenan cu rednan social te ainda no ta comproba di ta safe,” Murthy a bisa. “Evidencia for di estudionan di tabaco ta demostra cu e labelnan aki por aumenta conscientisacion y cambia comportamento.”
Murthy a bisa cu e uso di djis un label no lo haci rednan social safe pa hobennan pero ta forma parti di e pasonan cu lo ta necesario.
Uso di rednan social ta prominente den medio di hobennan, cu mas o menos 95 porciento di hoben di entre 13 pa 17 bisando cu nan ta usa un plataforma di red social, y mas cu un tercer parti bisando cu nan ta usa rednan social “casi constantemente,” segun data di 2022 di Pew Research Center.
“Rednan social di awendia ta manera tabaco decadanan atras: E ta un producto cual su model di negoshi ta depende riba muchanan adicto. Y di mesun manera cu sigaria, un ciruhano general su label ta un paso critico den direccion di mitiga e menasa aki pa muchanan,” Josh Golin, director ehecutivo di Fairplay, un organisacion dedica na caba cu marketing dirigi na muchanan, a bisa den un declaracion.
Pone e label riba plataforma di rednan social lo tuma accion di congreso y e no ta cla con rapidamente esaki lo tuma luga, aunke tin unidad bipartisano tocante e seguridad di muchanan online. Legisladornan a organisa varios audiencia den Congreso tocante seguridad di mucha online sinembargo e ley federal tocante proteccion di muchanan online a ser crea den 1998, 6 aña prome cu Facebook a keda funda.
“Mi ta spera cu e lo keda combina cu hopi otro trabao cu Congreso ta purbando di haci pa mehora e seguridad y diseño ademas di privacidad di productonan di red social,” Dr. Jenny Radesky, un pediatra di comportamento den desaroyo na University of Michigan a bisa. “E dos elementonan aki lo bay man den man, pa motibo cu tin asina hopi trabao cu Congreso por haci pa sigui e pasonan di Reino Uni y Union Europeo den aproba leynan cu ta tuma na cuenta kico muchanan tin mester ora di interactua cu productonan digital.”
Hasta cu aprobacion di congreso, e label di advertencia ta probabel di keda desafia den corte pa companianan di tecnologia.
“Pone un label di advertencia online cientificamente no tin sentido, pa motibo cu e ta bay den contra di e derecho constitucional di libertad di expresion,” Adam Kovacevich, CEO di grupo di politica di tecnologia Chamber of Progress, a comenta. “E ta sorprendente pa mira un Ciruhano General ta ataca rednan social ora cu hobennan mes ta bisa cu e ta provee un plataforma pa conexion social importante.”
