Na 2023 e industria di crucero na Aruba a conoce un recuperacion remarcabel yegando na 98.3% di e nivelnan di bishitante compara cu 2019 y sobrepasando tur expectativanan prome cu e pandemia. 2024 tambe ta demostrando di ta un aña prometedor pa e industria, unda ta spera di sobrepasa e record di cantidad di pasahero na 2019. Aruba Ports Authority N.V. ta premira cu 2024 lo conoce un crecemento di alrededor di 4% compara cu 2019.

Mañan, diamars 18 di Juni, Aruba lo wak un bon dia pa e industria cu 3 barco den waf. Carnival Vista, Celebrity Beyond y Carnival Celebration, lo trece alrededor di 12 mil pasahero cual sigur lo trece su impacto den centro di Oranjestad y rond di Aruba. Esaki sigur ta un desaroyo importante ya cu actualmente nos ta den e temporada abou di e industria y esaki ta yuda empuha e sector comercial pa nos isla, particularmente den e centro di nos cuidad.

Un estudio recientemente publica door di Aruba Tourism Authority ta indica cu na 2023, un turista di crucero ta gasta un averahe di $172.50 durante nan estadia di un averahe di 12 ora riba nos isla. Esaki sigur ta un contribucion importante na nos economia. Ademas di e impacto economico, estudionan realisa door di Cruise Line International (CLIA) ta indica cu alrededor di 60% di pasaheronan cu a yega di bishita un destino pa prome biaha den un crucero ta regresa e destino como ‘stay-over’, subrayando un potencial importante di e industria aki. Conversion di turista crucero pa turista ‘stay-over ta un meta importante pa Aruba.

Ariba www.arubaports.com den e seccion di schedule di barconan di crucero por haya mas detaye di e barconan crucero cu lo ta den waf mañan.

Tocante Aruba Ports Authority:

A funda Aruba Ports Authority N.V. na aña 1981. E compania ta pertenece 100% di Gobierno di Aruba y tin 80 trahado den servicio directo. Hunto ta maneha e dos wafnan di Aruba, pues tanto esun di crucero na Oranjestad como tambe esun di carga na Barcadera, unda nan tin un acuerdo di operacion cu ASTEC. Pa aña ta yega mas o menos 330 crucero na Oranjestad. E compania ta stabiel y ta bou maneho di Marc Figaroa.