Diabierna ultimo, Stichting Stylo a tene un conferencia di prensa hunto cu nan sponsor pa presenta e proyecto “Papiamento ta mi Idioma” cu ta bay tuma luga dia 24 di juni awor na Museo Cas Tan Tin pa asina celebra idioma y cultura di Aruba den un anochi di ambiente caminda nan lo uni e pasado cu presente.

E proyecto aki tin e meta pa conscientisa cu Aruba tambe tin un idioma y no ta un dialecto mas, cu Papiamento ta para band’i idioma Hulandes. Diseño di e T-shirtnan cu a ser crea pa e proyecto aki ta pertenece na un mucha di 12 aña e cual a pone tur su talento y creatividad den esaki manera a informa.

Melvin Boekhoudt ken ta presidente di Stichting Stylo a bisa cu dia 24 di juni for di 7or te cu 11or di anochi nan ta bay celebra di manera protocolar e tradicion di e Fiesta di San Juan, un fiesta cu ta celebra e tradicion di isla Aruba na unda ta bay tin un baile cultural cu un obra teatral presenta pa Sr. Jhon Fredy Montoya sin lubida e dushi musica na papiamento cu canticanan di antes cu ta hiba hendenan den tempo di aña 1950, treciendo asina pa comunidad di Aruba e honor di herencia cultural.

Den esaki, lo por mira e vestuario cu hendenan tabata usa antes na unda no ta bay ta un show solamente pa cultura sino tambe pa trece e pasado den presente manera Boekhoudt a sigura.

Un di e momentonan mas interesante di e anochi aki ta bay ta un ceremonia pa duna reconocemento na algun un personanan special cu ta dedica nan mes na preservacion, promocion y duna balor na idioma papiamento. E reconocemento aki ta pa demostra cu Aruba ta un pais cu ta balora su hendenan y su herencia cultural, di e forma aki nan gradici na e personanan aki y ta admira nan trabou y nan lucha pa mantene idioma papiamento na halto pa futuro generacionnan di Aruba.

Cu e actividad aki nan kier cuminsa promove idioma papiamento “pasobra esaki ta di nos, ta un herencia cu nos a haya di nos grandinan y nos tin cu cuminsa proteha nos idioma, p’esey nos tur tin cu uni pa asina trece un tremendo trabou pa nos futuro generacion pasobra ta nan ta esun cu ta bay bin despues di nos y ta bay percura pa nos lenguahe keda.” Boekhoudt a sigura.

Nan ta un organisacion cu ta promove e lenguahe papiamento, pa esaki Boekhoudt a sigura cu nan no ta un corector pero nan ta bringando si pa por yega na e nivel ey.

“Den nomber di Stichting Stylo Aruba y tur nos sponsor, nos no tin palabra pa gradici pasobra e ta un tremendo ayudo cu nos a haya di nan,” el a bisa.

Boekhoudt a haci entrega di e prome T-shirtnan di “Papiamento ta mi Idioma” na sponsornan presente y tambe a señala cu lo tin mas sorpresanan cu ta bay bin den proximo dianan.

Ademas, el a trece dilanti cu Stichting Stylo Aruba a ser lanta na aña 2010 pero na prome instante nan no tabata kier sali den publicidad, “nos semper a traha tras di cortina, den temporada di Covid-19 nos a yuda hopi hende y hobennan pa nan no perde nan aña escolar, awor door di e proyecto aki nan a tuma e decision pa bin dilanti y p’esey hopi hende no ta conoce nos pero comerciantenan cu a sostene nos si sa di nos.”

Boekhoudt a sigura cu nan no ta haya subsidio di ni un instancia sino cu nan ta depende riba lo cual comercio por duna nan y cu esey nan ta duna comunidad back.

Di loke ta trata e proyecto aki “Papiamento ta mi Idioma” el a comenta cu nan tin tres aña cu a cuminsa traha den dje pero no ta un proyecto di nan mes, e idea original tabata di Etty Toppemberg den feliz memoria y Boekhout a tum’e back “e ta un persona cu a traha hopi duro pa su cancionnan, el a traha hopi duro pa Aruba, Etty Toppemberg semper a bisa cu mester bin algo pa promove papiamento y awe su soño a bira realidad.”

Asina mes, a anuncia cu nan ta bay tin proyectonan pa hoben como tayernan y cursonan.

Evento di dia 24 di juni ta un evento priva protocolario, pa motibo cu Museo Cas Tan Tin no tin capacidad pa hopi hende, sinembargo, Boekhoudt a informa cu den transcurso di dianan lo tin mas informacion pa un evento mas grandi pa publico en general e cual ta e di dos fase di “Papiamento ta mi Idioma” y esey ta bay ta gratis.