Directie Natuur en Milieu ta e departamento cu tin e meta primordial di mantene, protege y mehora calidad di naturalesa y medio ambiente na Aruba, recientemente e departamento aki conhuntamente cu otro partners a elabora e rapport Standard Operating Procedure (SOP) cu pa prome biaha ta relaciona cu e implementacion di construccion y iluminacion respetuoso pa flora y fauna di Aruba.

E rapport cu a ser crea conhuntamente cu entre otro, Cuerpo Policial di Aruba, Dienst Technishe Inspecties (DTI), Aruba Hotel And Tourism Association (AHATA), ELMAR, Turtugaruba, Space and Nature Aruba Foundation, Directie Openbare Werken (DOW), Aruba Conservation Foundation (ACF), Aruba Tourism Authority (ATA), Asociacion di Ingenieronan y Architectonan Arubano y DarkSky International ta señala cu for di e ciere di refineria Lago, Aruba ta experimenta un modelo di crecemento di turismo di masa, centralisa den volumen cu mas turismo, mas desaroyo, y por lo tanto, mas importacion di man di obra.

E utilisacion di areanan terestre y maritimo pa ampliacion di e zona turistico y crecemento di poblacion a ser desaroya di un manera descontrola y como consecuencia na esaki, flora y fauna autoctono tabata someti na un presion basta grandi den ultimo añanan.

Como un ehemplo, di e crecemento desekilibra di urbanismo a provoca un aumento di contaminacion di luz, perdida di espacionan natural y ecologico. A pesar di aplicacion di normanan y reglamentonan pa protege e parke nacional, imagennan di satelite ta mustra un aumento significativo di luz den parke.

Contaminacion di luz ta un topico cu cada bes ta haya mas atencion na Aruba, loke a asocia e topico cu sentimentonan positivo manera seguridad y comodidad, mientras cu scuridad tabata asocia cu actividadnan ilegal. Industria di iluminacion kier trece na consumidornan cu luz adicional ta preveni mas delincuencia, sinembargo, no tin pruebanan solido di esey. Por lo tanto, ta conveni distingui seguridad den sentido di prevencion di accidentenan personal y proteccion contra delincuencia y actividadnan ilegal.

Den ultimo añanan, a keda na cla cu luz no semper den tur luga ta algo deseabel. Particularmente e luz artificial nocturno cu no solamente tin un efecto perturbador den flora y fauna sino cu tambe ta afecta salud y bienestar di ser humano, e consecuencianan di e perturbacion aki por altera e ritmo biologico, desorientacion (por ehemplo di turtuganan marino) e cual ta altera nan calidad di bida y nan habitat.

E SOP aki a ser crea pa varios organisacionnan local den defensa di naturalesa, unda tin conocemento y experticio di profesionalnan combinando informacion riba e tema di contaminacion di luz unda a elabora politica y su aplicacion.

E obhetivo di e rapport ta formalisa e norma den cual mester dispone e diferente fuente di luz pa no perturba naturalesa of haci’e cu menos impacto, di acuerdo cu articulo 7, lid 3 di Natuurbeschermingsverordening (AB 1995 no. 2). Ademas e SOP tambe ta aspira na un enfoke integral den cual e producto final lo por sirbi di apoyo pa adapta of redacta leynan nobo di medio ambiente unda ta trata specialmente di: politica medio ambiental, politica energetico, ROP, luznan riba caminda publico, plan di gestion di ACF y permiso.

E meta ta pa elimina e luz innecesario of cu ta molestia y aumenta scuridad. Pa iluminacion, cu ta realmente necesario, ta describi e condicionnan di un iluminacion mas respetuoso cu e bestianan.

Pa un alcance mas eficiente, mester protege e areanan cu ta scur, sinembargo, e hecho cu e luz ta ilumina leu ta haci importante pa pone atencion na e zona rural pero tambe na entorno urbano. Ora ta pone luz den un zona urbano e briyo di e shelo ta disminui.

Contaminacion di luz por ta debi na varios fuente di luz como por ehemplo: iluminacion di hardin di hotelnan, palonan di luz riba caminda publico of decoracion di luz, den obranan di arte, iluminacion di avisonan, di veld deportivo, areanan den construccion, di parkeerplats, entre otro.

E fuentenan di luz aki por ocasiona molestia of contaminacion na diferente nivel, por ehemplo iluminacion di un aviso publicitario cu ta ilumina un cas, pero e SOP aki ta referi na e contaminacion di luz den horizonte y briyo di e shelo.

Pa esaki, mester di diferente rekisito necesario, conscientisacion riba importancia di proteccion pa crea apoyo. Varios organisacion ecologista di Aruba ta poniendo nan esfuersonan pa conscientisa e hotelnan, departamentonan gubernamental y publico en general cu campañanan manera Earth Hour, ademas ta necesario pa compronde hopi bon e problema y e situacion actual cu ta necesario pa elabora politicanan specifico.

Pa loke ta trata responsabilidad, luz artificial por provoca problemanan di salud humano y animal, por ehemplo, contaminacion di luz ta e mayor menasa pa turtuganan marino cu ta protegi na Aruba y por daña nan biodiversidad. Pa e motibo aki, tur partner interesa y ciudadanonan tin e responsabilidad di lucha contra esaki y spaar energia.

DNM ta un departamento di formulacion di politicanan y tin e responsabilidad di incorpora scuridad den plannan di politica medio ambiental, ademas nan por tuma medidanan ora ta trata di especienan protegi.

DOW ta responsabel di construccion y mantencion di luz riba camindanan publico di ELMAR, na e momentonan aki DTI, DIP Y DOW ta papia di un posibel transferencia di ELMAR y DTI pa e gestion aki.

Agentenan di Cuerpo Policial di Aruba ta relaciona cu control riba espacio publico haciendo tareanan di vigilancia, Aruba Conservation Foundation ta gestiona e areanan natural protegi na Aruba, nan ta pone nan esfuersonan pa protege flora, fauna y bestianan y ademas ta duna informacion na comunidad pa crea consciencia publico riba balornan ecologico.

Pa un procedemento, lo por elabora un plan di iluminacion pa edificionan nobo y proyectonan den futuro, den plan di iluminacion ey mester tene na cuenta e naturalesa rond di dje y iluminacion existente na e luga, pa evalua e impacto di proyectonan nobo y supervisa e progreso. Diseño cu mas respet pa e bestianan pa evita e luz innecesario como por ehemplo, luznan cu sensor di movemento.

Pa finalisa, nan a duna como recomendacion cu e procedura anterior ta coresponde na 5 principio estableci pa DarkSky International y Illuminating Enginering Society (IES). Asina mes, ta existi un similitud grandi entre e SOP aki y e “principio di bon practica” di gobierno Australiano (National Light Pollution Guidelines for Wildlife) na unda aplicando e principionan aki luznan riba caminda publico por ta responsabel y funcional den oranan di anochi, ta bay spaar energia y placa. E proyectonan cu lo incorpora a principionan aki lo reduci contaminacion di luz y e molestia pa flora y fauna di Aruba.

Den un di e potretnan, ta ilustra e aumento di contaminacion di luz na Aruba debi na crecemento desekilibra den area urbano entre 2012 y 2023. Credito di imagen: lightpollutionmap.inf.