Plataforma Raiz ayera mainta a tene un conferencia di prensa pa informa cu nan ta cumpliendo siete aña caminda, minister di Integridad y tambe lider di e partido, Ursell Arends a sigura cu den añanan aki nan tur a traha hunto pa mantene y haci e plataforma aki relevante.

Arends, acompaña di parlamentarionan Raymond Kamperven y Misha Raymond, ademas di Carlos Guiamo ken tambe ta miembro di e partido, a splica cu den ultimo tres aña nan ta bin implementando nan vision progresivo cu ta brasa tecnologia y sostenibilidad como e yabi pa futuro. “Y esaki ta loke nos ta bin ta haci y nos lo keda haci tambe. Como plataforma Raiz nos ta stimula union no solamente den comunidad, pero tambe den gobernacion y nos ta laga un banda e parti di division cu ta desempodera nos.”

Como partido, el a sigura cu nan ekipo ta creciendo, cual tambe ta duna nan espacio pa asina cuminsa informa comunidad regularmente cu “ta bay tin caranan nobo cu ta bay forma parti di nos plataforma den eleccion 2025 y na su debido tempo nos lo presenta esakinan tambe,” Arends a comenta.

Na aña 2021, cinco asiento a bay pa partidonan chikito y nan ta convenci cu pa proximo eleccion na 2025 esey ta bay sucede tambe pero cu 7 asiento. Esey ta pone cu partidonan nobo of esun chikito ta bay sigui crece, “pa asina conhuntamente nos por cambia e politica aki na Aruba.”

Di su parti, Misha Raymond a trece dilanti cu tin hopi desaroyo cu ta tumando luga den e plataforma. Ademas, su persona como parlamentario a atende e Interparlementair Koninkrijksoverleg (IPKO) na Den Haag recientemente, den cual parlamentarionan den Reino ta bin hunto. Eynan 25 studiante di Boneiro, Saba, Corsou y Aruba a presenta e nan preocupacion cu nan ta hayando na Hulanda, unda nan papia tocante vivienda y un punto importante, nan salud mental. E studiantenan aki ta sufri di depresion y racismo, unda loke a sali for di rapport tambe di Ombudsman ta cu tin cierto aspectonan di maneho cu mester haya prioridad pa e hobennan di Reino cu ta bay Hulanda pa studia.

“E dialogo a ser habri, studiantenan mes a papia cu nos, cu representantenan di cada pais den reino pero tambe cu representantenan di Eerste Kamer y Tweede Kamer y nan tabata basta enfoca riba kico ta pasando,” Raymond a sigura.

Tambe el a bisa cu tin hopi desaroyo pa studiantenan bay studia na Merca of Universidad di Aruba. Pero e ta considera cu informacion mester bin hopi mas trempan, pa motibo cu hopi di nan a bisa cu si nan tabata sa loke nan ta pasando na e momentonan aki, kisas nan lo a scoge un otro direccion.

“Pero mas cu tur cos mi ta kere cu studiantenan, a traves di social media, nan ta hopi mas habri pa e otro opcion cu tin tambe fuera di Hulanda. Hulanda ta un opcion pasobra e ta cay den reino, eigenlijk e mester facilita studiantenan pa studia ayabou; pero nos ta mirando cu e situacion ta birando mas duro pa nan, pa caba di studia, bin back y eherce nan funciona akinan na Aruba,” el a sigura.

Ademas, el a bisa cu e hecho cu 25 studiante a trece dilanti nan preocupacion y nan sentimento di loke nan ta pasando na Hulanda, tabata un desaroyo positivo pa e problema aki.

Parlamentarionan di Corsou cu tabata na IPKO a expresa cu nan ta sinti cu ta bay bin hopi cambio mirando cu Hulanda tin un gobierno nobo, pa esaki, Raymond a afirma cu dos aña pasa nan a pidi pa reunion di IPKO tuma luga riba diasabra pa e kamerleiden ta mas involucra “a mi no a wak mucho diferencia, p’esey ma bisa ta bon pa tende pero bo mester participa y e participacion di e kamerleiden ta limita, mi ta sinti si cu na momento cu bo ta wak un direccion mas rechts den politica na Hulanda, mi ta puntra mi mes ki espacio ta bay tin pa sigui trece cos dilanti na IPKO, mi no ta di acuerdo cu colega a bisa cu nada ta sali for di IPKO, pa mi esey no ta berdad.”

Den otro topico, ley di matrimonio di mesun sexo lo haya su votacion na Parlamento di Aruba dia 18 di juni y Raymond a expresa cu e kier wak pa e ley pasa “a mi semper a bisa cu pa plataforma Raiz nos no ta exigi voto di ni un hende, nos ta exigi democracia si, pa duna transparencia como politico, con bo ta para pa e tema aki, a mi no sa kico pa spera, mi ta spera si pa tur hende presenta, sinta y vota y pa no lo tin iregularidadnan bin dilanti pa no haci e votacion mas largo, mi kier wak pa e ley pasa y kico ta bay pasa e dia 18 di juni.”

Si den caso cu e votacion keda 10 na fabor y 10 den contra, el a comenta cu e no ta bay stop di lucha “e ta habri bo wowonan si di kico ta politica, bo lo kier pa tur hende ta sinta eynan pa bringa pa derechonan y contra discriminacion pero esey no ta e realidad y esey ta pone bo pensa unda nos kier bay como pais.”

Pa finalisa, minister Arends a sigura cu nan como partido a bin pa implementa un vision cu ta inclui tecnologia y sostenibilidad y nan ta contento di loke nan ta bin ta haci pero tambe mester tene na cuenta cu “ora bo ta goberna den un coalicion tin cierto cosnan cu a bo como plataforma kier pusha pero no tur ora bo ta logra, nos ta satisfecho cu e trabou cu nos ta bin ta haci, nos a priminti pueblo pa cierto cosnan cu nos kier logra y poco poco nos ta logrando nan tambe, esey ta duna nos e confiansa cu e plataforma ta sigui crece.”

Pa celebra nan di shete aniversario nan ta invita comunidad pa e celebracion cu lo tin awe nochi na Mangashina na Koyari, for di 7pm te cu 9pm segun nan a informa.