Articulo den cuadro di Dia Mundial contra abuso di Adulto Mayor, dia 15 di juni.

Pa e ocasion aki por lesa algun tips.

E tips di awe ta:

Reconoce e alertanan (Red Flags) di Abuso di Adulto Mayor

E ekipo di cuidadornan por encontra diferente indicadornan comun di abuso di Adulto Mayor durante nan trabao. E indicadornan aki ta entre otro:

  • Plekinan blauw inexplicabel, lesion, fractura.
  • Cambionan diripiente den conducta, manera aumento den ansiedad, retira su mes socialmente of depresion.
  • Aparentemente tin problema financiero of ta haya transaccionnan straño den e cuenta di banco di e persona.
  • Mal higiena personal of falta di paña apropia of productonan di cuido personal.
  • Isolacion social of acceso limita na bishitante- of amistadnan.
  • Mal nutricion, deshidratacion, of maneho inadecua di remedinan hasta polypharmacia (uso di mas cu 5 remedi y of droga).
  • Ta necesario pa regularmente evalua y controla e salud y bienestar (incl. Alimentacion, uso di remedi/droga drumimento, etc., ) di un Adulto Mayor bou cuido, un ekipo di cuidador mester pone atencion na cualkier cos cu ta parce fuera di normal y raporta esaki. Esaki ta encera cambionan fisicamente y di conducta, discrepancia financiero, isolacion social y indicacion di negligencia.

Raporta y Documenta bo preocupacionnan

Ta importante pa cuidadornan ta documenta nan observacionnan y raporta cualkier preocupacion cu por ta relaciona cu abuso di Adulto Mayor of indicacionnan of incidentenan cu ta encera abuso. Lamentablemente raporta un abuso No tur ora ta ser mira como un obligacion di e ciudadano.

Ta necesario pa cada ciudadano tuma su responsabilidad civico y documenta y raporta bo preocupacionnan den caso di cualkier abuso; Esaki sigur lo aporta na e seguridad fisico y bienestar di e Adulto Mayor y ta habri caminda pa intervencion na tempo y cu medidanan apropia por ser tuma.

 

Door di raporta e preocupacionnan na e autoridad apropia, manera supervisornan, managernan of otro servicionan di proteccion, ta yuda pa sigura cu accion ta ser tuma pa atende un posibel abuso di Adulto Mayor y proteh’e for di mas daño fisico, personal/emocional.

E raportahe mester encera un documentacion bon skirbi pa por resulta den un secuencia corecto di e eventonan, observacionnan y accionnan tuma. Door di documenta incidentenan, e ekipo di cuidadornan ta crea un fuente valioso pa investigacionnan of intervencionnan den futuro.

Documentacion tambe ta sostene e trabao di monitor continuo di e tratamento di e Adulto Mayor y ta yuda e manager di cuido pa desaroya un comprendemento completo di e estado fisico, emocional y mental di e Adulto Mayor y pa identifica cualkier preocupacion of indicacion di abuso y desaroya plan di prevencion.

Seminario: Topico: Conscientisacion y Prevencion di Edadismo y Abuso di Adulto Mayor den comunidad.

Un proyecto di Fundacion Alzheimer Aruba

Fecha: Diasabra 15 di Juni 2024.

Lugar: ATIA Building ; Gallegostraat 6, Dakota.

Orario: 13:00 – 17:00

Entrada: Gratis ; Un donacion di AWG 15.00 pa cubri e gastonan ta aprecia. Lo tin un box disponibel.

Pa inscribi por comunica cu: 592 1430. 592 8416

 

E contenido di e seminario di diasabra 22 di Juni, na San Nicolas, ta ser anuncia durante dianan nos dilanti den medionan di comunicacion.

Na e seminario dia Mundial Contra Abuso Di Adulto Mayor lo hiba palabra:

  • Sra. dr. Alida Marval
  • Mr. Gabri de Hoogd Topico: Explotación Financiero
  • Dr.Carlos Vallego: Abuso/ Discriminación di e adulto Mayor den Salubridad
  • Un reemplasante di Korpschef ( nomber ta pendiente).