Adulto Mayor ta un topico cu semper ta keda bin dilanti caminda Wit Gele Kruis (WGK) diamars ultimo a presenta su jaarverslag di Wijkzorg pa aña 2023, pa esaki, e director Carlos Goeloe a sigura cu nan e cera aña 2023 cu 31 hende den e lista di spera.
Esaki ta personanan cu nan no por yuda debi cu nan no tin e personal suficiente, segun Goeloe a sigura. El a splica cu na e momentonan aki nan tin 23 persona pa cuida 100.000 hende y cu esey no ta posibel.
Den hopi rapport di gobiernonan anterior a bin dilanti cu WGK mester expande pa haya mas personal pa cuida mas hende na cas, “mi mester bisa si cu minister Ursell Arends aworaki ta bezig cu comisionnan unda kier bin cu pasadia na diferente bario y esey ta algo di aplaudi, pero mester hende pa cuido den nan cas, e cuido directo pasobra nos grandinan ta birando mas grandi,” el a sigura.
Actualmente, tin 26% di e poblacion total di Aruba tin mas cu 60 aña y agrega na e situacion cu menos babynan ta naciendo nan tin cu traha riba e problematica aki pa loke ta trata falta di personal.
Segun Goeloe, e parti mas importante di esaki ta cu tin hendenan grandi na cas na e momentonan aki cu no ta hayando cuido y cu nan tin mester di e cuido. Tin diferente compania cu ta dedica na ofrece e servicio aki na Aruba mescos cu WGK “pero ora bo wak e prijsnan, ta astronomico y Aruba a bira hopi caro, ademas nos grandinan nan manera pa cumpra, no t’ey tampoco, nan pension no ta yega.”
Nan ta haya hopi adulto mayor cu ta yega na WGK pa paketenan di cuminda unda WGK ta traha cu tur e partner manera Fundacion Pa Nos Comunidad, pero lo cual nan ta mirando dia pa dia ta birando mas hopi debi cu adultonan mayor nan placa di pension no ta suficiente.
OPPA a menciona e problematica aki tambe den diferente entrevista, sinembargo, WGK tin cu atende e tema aki contratando mas personal “si bo ta duna mi 10 persona aworaki pa cuida, mi por yuda 50 pa 60 persona cu ta na cas, cu no ta e otro 31 cu no ta haya ayudo, pero mi ta kere tin mas afo.” Goeloe a señala.
Cifranan di adulto mayor ta bay sigui crece y mester aloca fondonan den Wijkzorg pa asina ey cuminsa tuma accion pa esaki, Goeloe a finalisa.
