Durante e siman cu a pasa Departamento di Aviacion Civil di Aruba a tene un accion di inspeccionnan di rampa na nos aeropuerto. Un total di 17 avion a wordo inspecciona. Esaki a wordo haci en conhunto cu coleganan Frances, cu ta basa den Antias Frances.
For di algun tempo caba Aruba tin un team di 4 inspector local cu ta cualifica pa conduci inspeccionnan di rampa segun e sistema Europeo di “SAFA” (Safety Assessment of Foreign Aircraft). Resultado di e inspeccionnan ta wordo hinca den e SAFA database cu ta contene resultadonan di inspeccionnan haci na otro paisnan cu ta parti di e sistema aki. Asina e resultadonan aki por wordo compara cu otro, y e data aki por wordo analisa mas efectivamente.
Como parti di un acuerdo di cooperacion cu Francia, inspectornan di Aruba ta haci e inspeccionnan hunto cu inspectornan di Antias Frances, cu tambe ta parti di e red di SAFA. Tin biaha esaki ta tuma luga na Aruba, y tin biaha esaki ta tuma luga den Antias Frances. E cooperacion aki ta yuda grandemente pa standarisa e manera di traha y pa siña for di otro. E siman aki a toca pa inspectornan di Antias Frances haci inspeccionnan na Aruba hunto cu nan coleganan di Aruba.
Un total di 17 avion a wordo inspecciona. Avion di tur tipo, avion grandi y chikito, di pasahero y di carga. E discrepancianan haya ta wordo manda pa e compania concerni pa asina nan tuma e medida di coreccion necesario. Departamento di Aviacion Civil ta keda monitor implementacion di esaki te ora cu tur coreccion tuma luga manera cu mester ta.
Durante añanan ta nota un tendencia na Aruba cu e discrepancianan constata ta birando menos den cantidad y den severidad. Tambe ta mira cu companianan di aviacion ta tuma e inspeccionnan na serio y ta tuma medidanan necesario di precaucion prome cu haci nan vuelo pa Aruba. Esaki ta mustra e balor agrega di e programa di SAFA, cu realmente ta contribuyendo pa eleva e siguridad operacional di aviacion na Aruba.
Minister di Transporte, Sr. Ursell Arends y Departamento di Aviacion Civil ta gradici su inspectornan y tambe coleganan di Antias Frances pa e bon trabou desplega durante e accion di e siman aki, y na e manera cu a coopera cu otro.
Departamento di Aviacion Civil lo keda haci e tipo di inspeccionnan aki na Aruba, no solamente pa eleva e siguridad operacional mas ainda, pero tambe pa asegura cu e nivel halto aki ta wordo manteni na un manera duradero, mirando e importancia di aviacion pa e economia di nos pais.
