Ki sorto di turismo… Gobierno ta busca…?

Pronto lo tin un ley pa regula e sector di acomodacion turistico conoci como ‘vacation rentals’, cual ta abarca tur acomodacion cu ta negoshi chikito di un o algun camber, propiedad mas tanto di ciudadano priva. Necesidad di regulacion di e sector tabata algo pendiente pa bastante tempo caba, ya cu esaki ta e sector cu mas a crece den ultimo añanan. Di esaki a surgi pregunta con ta garantiza control riba calidad cu ta ofrece na e cliente. Esaki entre otro pasobra control lo ta dificil si pa cuminza no tin un debido vista riba e sector, si no tin un registro nacional pa esaki. Esaki no ta preocupacion di gobernacion so, sino tambe di parti di e competidornan den e sector cu si ta someti caba na control y escrutinio di autoridad, tanto pa loke ta impuesto como salubridad publico, pa e aspecto di higiena.

Cu ta anuncia awor cu lo tin anto legislacion pa atende esaki ta bon noticia, siempre y cuando e ley cu ta keda aproba ta responde na e necesidadnan determina, sin stroba bon desaroyo di e sector. Como cu e ley ta den fase di conseho (di Raad van Advies) ainda, lo mester warda te ora esey ta disponible. Sin embargo, tin hopi aspecto di nos desaroyo turistico cu mester un mirada critico, pa orienta nos mes unda nos ta bay. Un promer asunto pa tene na vista ta: unda nos ta para cu nos producto ‘Aruba’? Como isla den Caribe nos ta na vanguardia di exito, empuha pa nos maneho extraordinario di e sector? Aparte di con nos ta mira esey, con e bishitante ta mira nos? Con realmente nos ta compara cu nos competidornan den nos region? Un contesta parcial nos por haya di un resumen riba e portal internacional Statista.com di e teritorionan mas gusta pa bishitante. Nos por mira cu entre e teritorionan isleño den Caribe na aña 2023, Aruba ta aparece apenas na di 10 posicion, riba un lista domina pa teritorio cu practicamente tur ta mas chikito den poblacion cu Aruba. Ariba na e lista nos ta haya un isla manera Dominica, sigui pa Galapagos (unico no den caribe), Eleuthera (Bahamas), Anguilla, St. Lucia, St Barths, entre otro.

Pakico hende ta scoge pa e islanan aki? Pasobra nan ta ofrece algo cu Aruba (ya) no tin: tranquilidad. Pakico nos ta diferente? Pasobra riba un teritorio cu no ta mucho mas grandi cu esun di e islanan aki, nos a logra prop mas di un miyon bishitante ‘stayover’ pa aña. A base di loke nos mes tabata promove como meta di nos exito, nos a despedi caba di loke un tempo tabata nos oferta di tranquilidad. Pa nos suerte nos no a perde tur loke ta seguridad, a pesar di suceso manera e desaparicion di Natalee Holloway. Pero, cu nos tendencia di mas di 1,5 miyon bishitante total, stayover y cruise, nos ta optando pa un posicion entre e teritorionan grandi den nos region, manera Cuba, Republica Dominicana, Jamaica y Puerto Rico, cu varios miyon turista pa aña cada uno. Nos a yega na e maximo posible den e liga aki, mirando nos tamaño, pero di otro banda, pakico nos no por bolbe na e categoria di e islanan chikito, si acaso nos tabata desea esey? E contesta corecto, segun nos, ta cu nunca nos tabata parti di e categoria ey. Aruba su turismo a surgi desde comienzo como turismo di unidad grandi, di hotel grandi. Loke si nos tabatin ainda tabata e tranquilidad pasobra e volumen di bishitante no tabata asina enorme ainda. E islanan cu awor tin exito ta pasobra den hopi caso nan por ofrece operador di tamaño modera un playa priva, permitiendo nan ofrece un ambiente exclusivo na un nivel di prijs corespondiente, algo cu casi nos no conoce. Di tur manera e caracteristica bastante unico den Caribe di Aruba, cu su costa generalmente di caracter publico, y e hecho cu loke tabatin na tereno na costa ta ocupa caba, ta haci cu nos tin cu sigui riba e ruta cu nos a scoge, of no…?

Ta posible cu e opcion di ‘vacation rentals’ ta ofrece algo diferente toch? Segun nos, e exito abrumador di e opcion di no keda na un hotel, sino den un apartamento individual den cualkier bario, ‘mey mey di pueblo’, den ambiente local, ta algo cu mas y mas ta atrae turista pa no sinti nan mes asina tanto ‘turista’ pero pa tin siquiera e sensacion cu nan a siña conoce e comunidad local. Cu e nocion cu conoce comunidadpor ta mas bien basa riba impresion subhetivo, no ta kita e realidad cu esey ta motiva hopi turista.

Ta straño anto cu nos tambe a keda confronta cu e desaroyo aki? No, loke ta straño ta cu nos gobernantenan no tabata sa di desaroya maneho den e sentido aki, pasobra no a haci un escogencia, mientras e desaroyo internacional tabata sigui su rumbo. E hecho cu te awe ainda nos ta presenciando apertura di mas hotel pa fomenta mas turismo di masa, ta papia pa su mes. Ta facil pa nos autoridadnan turistico papia di ‘low volume, high revenue’ pero lo ta bon si nan por splica kico esey ta significa, si nan ta keda fomenta lo contrario. E miedo cu nos tin ta cu e legislacion na caminda ta pa restringi e acceso na turismo, como empresario chikito, di e persona local cu ta mira oportunidad den e tendencia mundial describi. E ley aki por ta un oportunidad pa gobierno bisa, ‘de una vez por todas’, unda nan ta para…