Mientras cu miembronan di Parlamento di Aruba na e momentonan aki ta na Hulanda atendiendo e Reunion Interparlamentario di Reino (IPKO) na Den Haag, dos carta a sali ayera cu e peticion di reunion publico cu minister di Integracion Glenbert Croes y minister di Integridad Ursell Arends.

Parlamentario independiente Gerlien Croes, ayera a informa cu conhuntamente cu parlamentarionan Ryçond Santos do Nascimento y Miguel Mansur di partido Accion21 a manda dos carta dirigi na presidente di Parlamento di Aruba, Edgard Vrolijk, pa solicita dos reunion publico, un cu minister di Integracion Glenbert Croes y otro cu minister di Integridad, Ursell Arends pa e hechonan cu a tuma luga siman pasa encuanto entradanan hudicial na diferente cas, pero tambe na DIMAS y hasta den Bestuurskantoor.

“Dado cu e minister mester duna cuenta di tur loke ta sucede bao su direccion den organisacion oficial y mester garantisa e promocion di integridad administrativo, prevencion di corupcion y e bon funcionamento di Estado di derecho (cu tambe ta depende di integridad di podernan politico) e titularnan Gerlien Croes, miembro independiente, fraccion Accion21 y miembro independiente Dr. Ryçond Santos do Nascimento, kier invita lo mas pronto posibel na e minister responsabel, minister Glenbert Croes, na un reunion publico cu lo ser convoca, pa splica esfuersonan di e minister pa preveni violacion di integridad den su ministerio y cu lo ta e orden di dia,” un di e cartanan ta señala.

Di mesun manera, a señala cu minister Arends ta responsabel di promove y garantisa integridad administrativo den aparato gubernamental y cu Bureau Integriteit Aruba (BIA) ta depende di su ministerio.

Siman pasa, e parlamentario Gerlien Croes a expresa su opinion tocante minister Glenebrt Croes cu ta biahando na e momentonan aki atendiendo reunionnan di trabou manera e mes a informa riba su Facebook page.

E parlamentario Gerlien Croes a trece e punto dilanti tocante e responsabilidad ministerial pa loke ta trata e reciente investigacion cu Landsrecherche bao guia di hues comisario y Ministerio Publico a cuminsa denomina “Portulaca” riba posibel delitonan di corupcion y otro hechonan castigabel relaciona cu otorgamento di permisonan di estadia entre 2020 y 2022.

Croes a cuestiona minister Glenbert Croes, esun encarga cu e cartera aki caminda siman pasa a biaha pa Suisa y Spaña te dia 20 di juni, pero “mientrastanto cu e wea ta ariba stoof na candela e doño di cas ta biaha awe tardi bay Suisa y Spaña te dia 20 di juni.”