(DW) – Un atake arma nobo a laga siete persona fayecido na Ecuador, na momento cu desconocidonan a tira contra personanan cu tabata den un veld di futbol, segun prensa local a informa diadomingo ultimo.

E hecho a sucede na municipio di Ventanas, na provincia tropical di Los Rios, na pleno luz di dia, na un veld na sector Rincon de Cura, manera e canal di television Ecuavisa a indica ora a informa cu cinco persona a muri na e luga di e atentado y otro dos na hospital na unda a hiba nan.

Riba rednan social un video a bay viral riba cual por mira e curpanan riba vloer, mientras cu na e luga por scucha gritonan desespera.

Provincia di Los Rios tin estado di excepcion implementa, igualmente cu den otro cuatro provincia como un medida di gobierno pa enfrenta e nivelnan di inseguridad.

Recientemente na Ecuador a sucede otro asesinato di hendenan cu tambe tabata na un veld deportivo na momento cu desconocidonan a yega y tambe a tira.

Spiraal di violencia na Ecuador a cuminsa na januari di e aña aki ora Gobierno tabata avansa cu su plan di seguridad, cu e obhetivo di recupera e control di prisonnan, hopi di nan domina pa gruponan criminal, cual tin un rivalidad cu a laga atras mas di 450 preso asesina for di 2020 den un serie di masacrenan carcelario.

E violencia aki tambe a yega hasta e cayanan unda Ecuador a bira un di e paisnan mas violento den region, cu 45 homicidio intencional pa cada 100.000 habitante na 2023.

Hefe di Polis di e ciudad di Ventanas, Edwin Iñiguez a manifesta cu despues cu nan a haya e yamada di emergencia na ECU-911 a activa e protocolnan di siguridad y nan a yega na e luga pa haya informacion y hiba e curpanan te mortuorio di Ventanas.

Den otro caso, na luna di mei ultimo e director di Seguridad Ciudadano y Control Teritorial di e ciudad di Portoviejo, a ser asesina, e tabata e responsabel di e politica di seguridad na nivel local. El a bira victima di un atentado mientras tabata na caminda pa participa den un acto di entrega na un caya.

E funcionario municipal a ser ataca cu tironan ora e tabata den un di e avenidanan cu mas transito di Portoviejo, e capital di e provincia di Manabi.