Recientemente Meteo Aruba a haci peticion na comunidad di Aruba pa tene cuenta cu e temperaturanan halto cu ta bay tin den e siguiente dianan. A traves di un comunicado di prensa e departamento a informa cu temperatura lo yega 34°C-35°C.
Esaki tabata debi na e pasada di un ola tropical cual lo a ocasiona biento zwak te modera y direccion zuidoost pa zuid pa e proximo oranan. Esaki ta pone cu heat index lo ta halto tambe entre 36°C y 40°C y por causa molester pa hende, specialmente hende grandi, pero tambe e mascotanan.
Ta importante pa doñonan di mascota ta consciente cu temperatura halto no solamente por afecta e ser humano, pero por tin efecto y consecuencia grandi pa e mascotanan, specialmente si e mascota ta pasa dia den cura di cas y no paden di cas.
Siguientemente ta sigui algun tips esencial pa cuida e mascotanan den temporada di calor.
Primeramente ta hopi importante pa mantene e mascota hidrata. Ta conseha e doñonan pa pone awa fresco y disponibel pa e mascota durante henter dia y mester ta pendiente cu e awa no ta caba. Tambe mester percura pa no pone e baki di awa den solo.
Percura pa e mascota, den e caso aki cacho, no ta mara den solo. Si e cacho ta mara na cadena, mester tene cuenta pa sigui e normanan describi den ley di cacho pa loke ta trata cadena di cacho. Esaki mester ta suficientemente largo y mester por yega comodamente na un luga cu sombra.
Tambe ta bon pa muha e cacho frecuentemente, sobretodo na su cabes y na su bariga, ya cu esaki por yuda baha e temperatura di e mascota.
Otro tip ta cu por corta e cabey di e mascota, si e ta un mascota cu hopi cabey of cabey largo, pa asina yuda controla e temperatura di e bestia. Ta importante pa remarca cu na momento di corta e cabey, no corta esaki mucho cortico pasobra e cabey ta sirbi tambe como un proteccion tambe pa kemadura di solo.
Por ultimo, evita cu ta haci actividadnan fisico pisa durante oranan cu e calor ta mas intenso. Si ta custuma di por ehempel saca e cacho pa cana den dia, pa haci esaki den oranan cu ta mas fresco y no na momento cu e solo ta mas cayente.
For di luna di mei ya caba diferente medio di comunicacion internacional a bati alarma pa un ola di calor cu ta tumando luga den area di Caribe caminda e sensacion di calor por yega te hasta 50°C loke por ta peligroso pa personanan cu ta traha of ta haci actividadnan den aire liber.
Nacionnan Uni a confirma cu 2023 a kibra tur record mundial pa loke ta temperatura halto, no obstante cu 2023 a cumpli 10 aña consecutivo di aumento di temperatura.
