Investigacion Portulaca: Tres persona deteni pa posibel hechonan castigabel relaciona cu otorgamento di permiso

Ayera mainta, diferente doorzoekingnan cu tabata tumando luga na diferente lugar a hala atencion di comunidad. Pero loke mas a hala atencion ta cu instancianan hudicial a drenta hasta den Bestuurskantoor. Minister di Integracion, Labor y Energia a duna un declaracion pa esaki.

Mediante un comunicado di prensa, Ministerio Publico a informa cu Landsrecherche, bao guia di hues-comisario y Ministerio Publico y den cooperacion cu Cuerpo Policial di Aruba y RST (Recherche Samenwerkingsteam), a tene doorzoekingnan ayera na 6 sitio, esta, dos cas, dos negoshi, Bestuurskantoor (Ministerio di Integracion, Labor y Energia) y DIMAS.

E doorzoekingnan aki a tuma lugar den cuadro di un investigacion di Landsrecherche di posibel delitonan di corupcion y otro hechonan castigable relaciona cu otorgamento di permisonan di estadia entre 2020 y 2022.

E investigacion aki ta conoci bou di e nomber di Portulaca.

Durante e doorzoekingnan, a tuma gegevensdragers (portadornan di dato) y administracion den beslag.

Igualmente, nan a señala cu te ayera, 3 persona a keda deteni.

E investigacion di Portulaca ta draai rond di e pregunta si companianan por a obtene permisonan di estadia pa nan empleadonan a base di motibonan cu no ta cuadra cu ley.

E doorzoekingnan di ayera a keda conclui, pero e investigacion penal ta sigui y pa awor Ministerio Publico lo no saca mas informacion. Den caso di desaroyonan particular den e investigacion, esey lo wordo comunica despues pa medio di un comunicado di prensa.

Reaccion di minister di Integracion, Labor y Energia, Glenbert Croes

Mediante un “LIVE” cu Gabinete Wever-Croes a haci via nan rednan social cu minister Glenbert Croes, a informa cu como minister encarga cu e cartera di Integracion, nan lo duna tur cooperacion pa cu e investigacion aki.

“Un di e prioridadnan di Gabinete Wever-Croes, desde cu nan a drenta gobierno, ta pa combati corupcion, y pa Minister Glenbert Croes esaki no ta un excepcion. Un di e areanan cu semper a conoce corupcion ta den e departamento di permiso, y aki ta unda e investigacion amplio ta tumando luga. Mester confirma cu minister di Integracion Glenbert Croes no ta implica den ningun asunto cu por ta dudoso y a duna instruccion na tur departamento envolvi, incluyendo su mesun ministerio, pa duna tur cooperacion necesario pa e berdad sali na cla, y cu por duna cuenta na pueblo di e rectitud di e proceduranan den e maneho cu gobierno ta hibando riba tereno di labor, energia y integracion,” el a bisa.

Minister Croes a splica cu e desafionan aki semper ta ser haya na momento cu “ta purba di goberna un pais corectamente, mirando cu den pasado ya nan a purba di implica minister den asuntonan incorecto, “pa mi ta importante pa pueblo sa, cu mi ta sostene e investigacion aki, paso ta asina so nos por caba cu e corupcion cu tin den loke ta proceduranan di permiso, na unda hendenan cu mester di un permiso ta ser hinca den situacionnan dificil pa por saca nan permiso,” minister Croes a expresa.

El a agrega cu “Gobierno ta desea pa e maneho cu ta ser hiba na DIMAS, y tur otro departamento, na unda hendenan mester acudi pa haya nan permiso pasobra nan a cumpli cu tur rekisito, ta un maneho corecto y husto pa esnan cu a bin estableci nan mes na Aruba pa un miho bida.”

Pa finalisa, el a expresa cu e investigacionnan asina aki ta di lamenta, pero e ta spera cu e investigacion lo tuma su tempo pa asina haya esnan envolvi den actonan aki lo carga cu e consecuencianan.

“Un di e camindanan cu a haci doorzoekingnan ta Cocolishi y esey no ta normal”

Parlamentario di partido MAS, Marisol Tromp, ken ta na IPKO na e momentonan aki, el a duna un declaracion na Bon Dia Aruba ayera atardi unda a señala cu Cocolishi ta un di e luganan unda a haci entrada hudicial. “Pero e no ta djis un luga, e ta e centro di Gobernacion cu supuestamente ta un lugar integro. Esaki ta di dos biaha cu nan ta drenta. Den pasado nan a haciele na 2020 pa e caso Flamingo y awor ta e caso Portulaca tambe bao di prome minister Evelyn Wever-Croes,” el a sigura.

Den Marisol Tromp su opinion, esaki no ta trata di un entrada hudicial normal. “E meta pa bo drenta den un lugar ta cu of bo ta bay pa detene hende, of bo ta bay saca informacion cu ta sirbi bo di prueba pa algo. Kiermen pa nan bay hacie den Cocolishi… Di su parti Glenbert mi ta wak cu el a absolve su mes pasobra el a bisa cu como minister nan no ta hinca den nada dudoso, pero e ta esun cu ta finalmente responsabel pa su ministerio.”

Pa e motibonan di duda, no transparencia y cu e priminti hende cierto cosnan via carta di e cual e tin e prueba, Tromp a sigura cu nan a presenta un mocion di desconfiansa dia 16 di april ultimo sin sa caba di esaki,unda e mocion aki a haya 8 voto na fabor, 12 den contra y un abstencion.

Reaccion di gobierno

Bon Dia Aruba a tuma contacto cu minister di Integridad Ursell Arends ken ta forma parti di partido di coalicion Raiz pa asina nan por duna nan comentario. A puntra minister Arends si tin un minister di gobierno ta implica den caso aki, ki consecuencia esaki por tin pa coalicion? Minister Arends no a contesta directamente, pero riba su pagina di Facebook a comenta brevemente: “Den gobernacion no tin ningun espacio pa corupcion. Ministerio di Integridad tin tur confiansa riba OM y e resultado di nan investigacion.”

Despues, den otro post, el a bisa: “Nos a experienci’e cu Dump Parkietenbos. Nos a experiencia mesun cos cu RWZI. Awo nos ta bibando e resultado di un modelo di bida di 5 strea sin planificacion. Persigui crecemento economico sin paga tino cu conservacion di naturalesa. Persigui desaroyo economico sin planifica e necesidad di produccion di coriente. Gobernacionnan cu ta traha pa siguiente eleccion y ta laga nos futuro generacionnan na caya.”

Mientras tanto, prome minister, Evelyn Wever-Croes a comenta:
“Manera ya ta conoci, Ministerio Publico a cuminsa un investigacion riba posibel corupcion na Dimas, riba e periodo di aña 2020 pa 2022. Gobierno di Aruba ta duna tur cooperacion na e investigacion aki, y ta pidi pa tur hende duna cooperacion pa investigacion por wordo haci.”

“Nos kier enfatisa un biaha mas cu integridad ta hopi importante den procesonan di gobierno y trabaonan di gobierno, y den e gobierno aki, kiebro di integridad tin consecuencia,” Wever-Croes a agrega. “Pa cualkier informacion riba e investigacion mes, nos ta referi na Ministerio Publico cu ta e unico instituto cu por duna informacion riba investigacion.”