Dialuna atardi Stichting Monumentenfonds Aruba (SMFA) a publica dos potret na unda tabata mustra un chubato den un area conoci na Rancho, den luga aki tabatin un cas cu e adres Ranchostraat 2 – 4 e cual nan ta señala cu tabata un monumento y cu awor a ser basha abou y bay perdi.
Esaki ta algo cu SMFA ta lamenta mirando cu tabata trata di un cas historico na area di Rancho y como fundacion encarga cu preservacion di monumentonan di Aruba, nan ta traha hopi di cerca cu otro organisacionnan y inversionistanan cu interes pa inverti den edificionan historico, pa asina brinda informacion y tambe conseho.
E area di Rancho sigur ta un cu pa hopi aña tin nan atencion mirando cu nan ta wak un potencial grandi pa desaroyo di e area cual ta un bario rico na historia y herencia cultural. Un ehempel di esaki ta e forno di Kalki cu a inverti den su restauracion y e watertank cual a haci investigacionnan caba pa su conservacion.
Asina nan tin contacto tambe cu comerciantenan cu interes den e area p’e importancia di conscientisacion y asina duna nan sosten pa desaroyo di e area conservando su balor historico.
Pa locual ta trata Ranchostraat 2-4 cual ta e cas cu a keda basha abou dialuna ultimo, varios biaha den pasado a busca pa un solucion pa cu un redestinacion pa e cas. SMFA den pasado a traha di cerca hunto cu diferente instancianan riba opcionnan pa realoca e habitantenan e tempo ey pero sin exito.
Nan ta consciente di e retonan social cu tin den e area y specificamente den e area di e cas na Ranchostraat 2-4 ya pa varios aña, a pesar di esaki nan tabata positivo cu por a yega na un solucion pa tur partido envolvi y asina desaroya e area.
Algun tempo pasa SMFA a keda informa di plannan pa basha e cas abou precisamente debi na e situacion ariba menciona y a atende esaki mesora indicando e interes di parti di SMFA pa yega na un solucion pa evita cu e cas bay perdi hasta si esaki ta encera tuma y of cumpra e cas.
Lamentablemente dialuna ultimo a tuma e decision di “sloop” e cas sin previo aviso.
Awor e cas aki cual SMFA ta considera tabata parti di nan herencia cultural, a pesar di no tabata conta cu un status di monumento proteha pa ley, awor no t’ey mas.
E incidente aki ta ilustra un biaha mas e vulnerabilidad di edificionan den areanan historico cu no ta conta cu proteccion. Tambe ta mustra di un banda e necesidad urgente pa mas proteccion di casnan y edificionan priva, di otro banda e importancia di conscientisacion di e comunidad pa cu Aruba su herencia cultural, cual SMFA a bin ta enfoca riba dje pa algun aña.
SMFA sigur ta traha di cerca cu tur instancianan encarga cu proteccion di monumentonan y Aruba su herencia cultural. Ayera despues di a tuma nota di e noticia di e ‘sloop’ na Ranchostraat a tuma contacto cu Ministerio di Cultura y Monumentenbureau como e instancia encarga cu proteccion pa asina expresa un biaha mas nan preocupacion tocante e necesidad urgente pa proteccion di edificionan historico.
Nan ta consciente cu tin basta desaroyo positivo ta tumando logra e ultimo temponan. Entre otro a cuminsa proteha algun monumento priva cual ta e caso di por ehempel Kapel di Alto Vista y e aeropuerto di Dakota, tambe por ehempel na Wilhelminstraat por mira hopi iniciativanan priva pa restaura monumentonan dunando nan un bida nobo. Pero ainda tin hopi trabou pa haci riba e tereno di preservacion di monumentonan na Aruba.
Stichting Monumentenfonds Aruba sigur ta haci un yamada na un y tur cu ta doño di un cas historico of ta desea mas informacion si un propiedad tin un balor monumental pa tuma contacto cu e instancia concerni cual ta Monumentenbureau.
