Fundacion Bernadina Growell-Kock ta invita tur musico y agrupacion musical cu ta desea di participa na nos festival di canto e aña aki pa pasa inscribi diahuebs awor dia 6 di juni 2024 na Cas di difunto Bernadina na Brazil 43. E orario lo ta di 7-9or. pm.
E festival cu lo tuma lugar dia 3 di augustus tin como meta pa recauda fondo.
Nos organisacion ta existi ya caba desde maart 2011.
Nos a inicia cu nos actividadnan cu e siguiente metanan:
*duna reconocimento na e labor y logronan di nos inolvidable Mama di Cultura, sra. Bernadina Growell-Kock q.e.p.d.,
*documenta y conserva su pertenencianan y
*conscientisa nos pueblo di e balor di nos mama di cultura y di cultura en general.
Entretanto nos a organisa diferente festival di cancion. Nos ta participa na e paradanan cultural y di luz den bario di Brazil. Nos a coloca un relieve na Paseo Herencia di mama di cultura y hunto cu Centro di Bario Brazil a organisa dos Parada Cultural riba caminda grandi dilanti nos Hotelnan. Nos a drecha cas di e difunto y na aña 2019 nos a publica un buki conmemorativo dedica na Mama di Cultura. Ademas nos a registra un cantidad di cancion di e difunto.
Fundacion Bernadina Growell-Kock tin mas proyecto pa futuro y pa es motibo aki nos ta cu organisa actividadnan pa por haya sosten financiero. Nos ta spera cu nos musiconan y agrupacionnan por pasa inscribi diahuebs awor pa haci e festival un exito.
