(DW) – Centenares di miles di persona diadomingo ultimo a yena e centro di ciudad di Sao Paulo pa celebra e marcha di orguyo LGBTIQ+ cu na 2024 a haci e invitacion pa “recupera” e colornan berde y geel di e bandera di Brazil, cu a ser tuma como emblema di derecha politico.

Un bandera di un regenboog grandi a cubri e parti dilanti di e Museo di Arte di Sao Paulo na Avenida Paulista, esun principal di e ciudad aki, den cual un ambiente di fiesta a reina cu mensahenan na fabor di respet “pa tur forma di stima, tur forma di ta.”

Bao e lema “Basta di negligencia y retroceso na Legislativo,” e gruponan organisado di e manifestacion tradicional a haci un yamada pa vota pa candidaturanan alinea cu derechonan di LGBTIQ+ den eleccion municipal cu ta bay tuma luga na october di 2024 na Brazil. Tambe, pa mantene vigilante na avance di iniciativanan conservador.

E marcha ta sucede poco dianan despues cu Congreso Brasileño a prohibi, cu votonan ultra-derechista y evangelico, promove of financia cu fondonan publico accionnan contra “concepto di famia tradicional,” aborto of cirugia di cambio di sexo pa hobennan. E disposicion, inclui den ley di presupuesto, a ser nenga pa presidente iskierdista Luiz Inacio Lula da Silva.

Participa den e marcha di Orguyo “ta e lucha pa visibilidad, contra violencia y bisa cu nos ta existi y nos ta ciudadanonan cu tur derecho y deber,” Eugenio Dos Santos, un persona bisti cu e T-shirt di ekipo di futbol di Brazil a bisa.

Na Brazil casi 20 miyon persona (10% di e poblacion) ta identifica di pertenece na comunidad LGBTIQ+, segun Asociacion Brasileño di Lesbian, Gay, Bisexual, Trasvesti y Transexual y Intersexual.

E prome marcha di orguyo na Brazil a ser realisa na 1997 y a reuni 2.000 persona. Awor ta considera como un di e mas grandi na mundo, cu un asistencia di tres miyon hende. E cita “ta crucial pa e pais por compronde cu e lucha aki ta pertenece na tur e sociedad.” E Drag queen Tchaka, un di e musa di e festeho bisti cu shimis berde y geel a bisa.

E pedido di bisti cu e colornan aki tabata un proclamacion contra ex-presidente Jair Bolsonaro y su gruponan aliado, cu a usa e colornan aki como simbolo durante e mandato di e ultra-derechista.

E idea a surgi despues di e reciente mega-concierto na Rio de Janeiro di Madonna, ken a interpreta un tema hunto cu e artista drag queen Brasileño Pabllo Vittar bistiendo e T-shirt di e “canarinha.”

Homofobia ta un delito na Brazil for di 2019, pero diario ta registra agresionnan pa hendenan homosexual y transexual. Segun organisacionnan di defensa di derechonan LGBTIQ+, 145 persona trans a ser asesina na 2023 y otro dies a mata su curpa.