Fundacion Hospice Atardi tin mas di 10 aña cu a ser crea cu e obhetivo duna ayudo y sosten na hendenan cu ta den fase final di nan bida, ora cu ya no tin cura mas caminda nan ta trata nan huespednan pa nan sinti den nan mesun cas cu amor y respet.

Den un entrevista special cu Matsy Van Oers director di Fundacion Hospice Atardi el a splica cu nan ta un fundacion manera un cas dedica pa esnan cu ta den final di nan bida, e ta enfatisa cu nan no ta un cas di cuido sino mas bien pa esnan cu tin un expectativa di bida di maximo 3 luna y cu pa cualkier motibo no por haya cuido adecua na cas, na e fundacion aki por duna cuido door di boluntarionan, enfermero, dokter di cas mes y su mesun famia unda mas hende ta haci e carga bira menos pisa pa cada un.

Van Oers a conta cu nan ya caba tin 10 aña di existencia bao iniciativa di algun dokternan di cas y despues el a sigui desaroya manera un fundacion cu un bestuur, coordinador, director y un ekipo di enfermero y boluntarionan cu ta zorg pa e cuido di e hendenan cu ta drenta.

Nan ta yama nan “huesped” cu por keda den e seis camber cu tin disponibel den e fundacion y nan ta keda bao cuido di dokter di cas.

E cuido cu nan ta duna ta esun denomina como cuido “paliativo” loke ta nifica cu no ta enfoca riba curamento di e persona pa motibo cu pa e huespednan e fase di curamento a pasa caba, por ehemplo, pa hendenan cu tin cancer y cu a haya kimoterapia pero e tratamento no ta yuda nan mas pa loke ta keda menos tempo di bida, si e persona ta na hospital por ehemplo, nan ta mande cas pero pa otro motibo tin biaha nan famia ta prefera di hibe na e fundacion aki.

“Cuido paliativo ta bastante pisa pasobra bo sa cu un hende ta bay fayece y nan ta hende cu tin basta sintoma, dolor, malestar, e ta un situacion basta delicado pa e huesped mes pero tambe pa e famia, e base di cuido paliativo cu nos ta duna ta e calidad di bida, nos no tin cura e persona aki, nos tin cu mantene of crea un calidad di bida pe mas cu por te e final di su bida,” Van Oers a sigura.

Pa nan ta importante pa destaca cu nan no ta adresa solamente e temanan di dolor sino tambe e espacio pa e sentimentonan cu e huesped por tin, por ehemplo, e por tin un of mas dia cu e ta sinti su mes cu rabia pa loke e ta bibando, tin biaha den famia tin problemanan cu ainda tin cu resolve y tur esey ta hunga un rol ora ta duna cuido paliativo, “tin biaha nos ta haya huesped cu nan ta cla pa bay, nan ta hopi trankilo, tin di nan cu tin fe den Dios, otronan no, pero tur hende ta diferente y nos no ta distingui nan pa esey, tur hende ta igual. Pa e famia di nan esaki tambe ta nan cas y nan ta bonbini, nos tambe ta scucha nan pasobra nos no por cambia nan situacion y nos ta duna nan espacio pa tur sentimento cu nan tin,” el a bisa.

Tin boluntarionan cu ta yuda cu cuido personal, loke e famia mes ta haci den nan cas pero ademas nan ta acompaña e huesped, yudele, scuche, conversa cune y cu su famia, boluntarianonan ta hopi importante pa motibo cu nan t’ey tur dia di siman for di mainta te cu anochi y ademas tin enfermeronan tambe.

Un di e boluntarionan ta Lydia Levestone, ken ta bay haci un aña den e funcion aki specificamente den area di cushina, e ta conta cu el a yega na e fundacion aki door di un amiga di dje cu tambe ta boluntario “pero e ta un experiencia hopi diferente, pasobra tin huesped cu bo kier mantene e distancia cu nan pero toch bo ta haya bo envolvi cu nan y e famia, nos ta conversa, bebe koffie, pero bo ta mak mee e final di e huesped y tin biaha bo ta bira emocional, bo ta sintie pero bo tin cu corda cu ta te akinan bo tin cu yega. A mi a gusta,” Levestone a expresa.

Pa Jair Koolman ken ta un stagiaire di EPI di VP el a splica cu esaki ta algo nobo pe y pa tur stagiaire pa motibo cu esaki ta e prome cu e ta haci, “mi ta haya cu e pa e trabou aki bo mester tin hopi compasion pa un ser humano, pasobra bo mester tin amor y cariño cu bo mester duna na hende cu ta bayendo, bo mester t’ey pa nan. Ta un experiencia nobo y dificil pa duna bo support na e huesped cu pa algun biaha nan ta nan so y bo ta sostene nan man, nos ta traha cu nan tur dia hunto cu e boluntarionan y bo ta crea un bon conexion cu nan y bo sa cu na final nan ta bay den cualkier momento.”

Van Oers tambe ta trece dilanti cu pa haci e trabounan aki nan mester ta fuerte mentalmente “mi ta profesional y a mi a wak hopi hende den situacion delicado pero akinan mi a siña cu no mester tin miedo mas na momento cu e ora ta yegando.”

Ademas el a pone enfasis riba e calidad di bida cu por duna na esnan cu ya sa caba cu e morto ta biniendo y nan no ta nenga na esey, nan ta preparando pe poco a poco, manera Van Oers a declara, “pero e bida cu tin den e luga aki cu no ta un area tristo, ni eng, unda tin biaha famianan grandi ta bin pa acompaña nan ser keri, pa nos e calidad di cuido ta importante y nos t’ey pa e hendenan cu “respet y amor.” El a finalisa.

Pa esnan interesa di yuda e instancia aki y bira boluntario di Fundacion Hospice Atardi, Van Oers a señala cu mester tuna contacto cu nan via nan Facebook Page Hospice Atardi of via nan website www.hospiceatardi.com