Ayera WEB Aruba y e compania Hulandes Bredenoord a firma pa un planta temporal di 20 Megawatt di energia, esaki ta trata di un planta ‘mobil’ cual lo sirbi pa por cumpli cu aumento creciente di demanda pa coriente, pero tambe como back up na momento cu motornan RECIP mester haya nan mantencion obligatorio.
E ceremonia a tuma luga pabou di planta di WEB caminda lo instala e planta ‘mobil’, e planta ta encera un total di 18 container di 20 pia cu ta contene generatornan di 850 KW y motornan marca Cummins, cual lo bay den operacion pa un periodo di 2 aña.
Na fin di juli lo cuminsa e instalacion di e motornan den container y ta premira pa nan bay den servicio na augustus proximo, e planta ‘mobil’ ta rekeri gasto di huur di mas o menos 5 miyon dollar pa 2 aña y e gasto di diesel cu ta mas di 11.5 miyon dollar, e gastonan pa sostene e componentenan y sistemanan auxiliar pa cu e planta ta calcula na casi 6.5 miyon florin.
Desaroyo economico recien, hunto cu e aumento drastico di turismo y construccion, combina cu cambio rapido di clima a impone desafionan nobo riba suministro di energia di Aruba. Un mision di WEB ta pa sigura 24/7 cu comunidad y industria ta suministra cu suficiente energia di calidad. Ta WEB su compromiso pa haci esaki strategicamente y a base di un Masterplan.
Durante e ceremonia, CEO di WEB Aruba a splica cu plannan semper mester ta basa riba proyeccionnan, cual no ta un tarea facil y data confiabel ta un ingrediente fundamental, aparte di analisis profesional. Desde mei 2023, a conoce un aumento enorme den demanda di energia, basa riba dato confiabel ta anticipa mas aumento den demanda di energia awor y den e añanan binidero. Ta anticipa mas crecemento di economia (y volumen di turismo) pero tambe cambio climatico caminda temperatura lo subi y keda subi, ta premira cu pa september/october WEB lo yega na un demanda peak 165 pa 170 MW, mientras cu na 2023 e peak tabata 155 MW.
Como cu ainda no a amplia e parti di energia renovable na e mix di energia, e motornan na WEB a bin ta traha overtime, creando e reto cu mientras mester produci, tambe mester saca motornan for di servicio pa nan mantencion obligatorio. E proyecto pa un planta di 20 MW di energia temporal ta forma parti di WEB su plannan di termino cortico, pa tin suficiente energia disponibel durante e temporada di calor, mientrastanto WEB a acerca consumidornan grandi di coriente pa cooperacion pa mitiga e demanda di energia. Riba termino mediano WEB lo instala baterianan na Balashi pa por almacena energia, pero tambe lo expande planta existente RECIP 3 cu dos motor adicional, riba termino largo, Aruba como nacion realmente lo tin cu materialisa e expansion renovable urgentemente.
