Manera a keda publica den nos edicion di ayera, parlamentario independiente Gerlien Croes a trece dilanti su preocupacion pa loke tabata sucediendo den Parlamento y ademas a haci declaracionnan contra prome minister Evelyn Wever-Croes.
Mirando e acusacionnan aki, mesora prome minister a reacciona den sala di parlamento mes riba e acusacionnan cu parlamentario Croes a haci contra e mandatario y su famia.
“Mi kier a enfatisa cu e acusacionnan aki ta falso, y cu cosnan sushi asina por sali solamente di un persona cu talbes tin envidia. Mi tata ta un hende di 82 aña, y ta un homber respeta den comunidad pa locual el a haci pa Aruba y pa su carera profesional. Ya ta 2 aña cu el a baha cu pensioen, y 2 aña cu e no tin niun laso ni cu Arulex Trust Services, ni cu e bufete di abogado Croes Wever Ruiz. E nomber Croes ta keda den e nomber di bufete di abogado aki, pa respet pa tur e añanan di trabou cu mi tata a eherce. E fam Wever ta di señor Rudy Wever den felis memoria, cu a fayece na 2007, pero pa respet a mantene e nomber aki, mirando cu nan ta esnan cu a funda e compania aki” prome minister a expresa.
Prome minister a señala cu diahuebs mes e lo tabata na caminda pa Ministerio Publico pa asina entrega un keho contra parlamentario Croes pa difamacion y pa un caso di rectificacion.
E noticiero local Noticia Cla a publica mas informacion ariba e tema aki indicando cu ayera den curso di dia prome minister a reuni cu su abogadonan riba e keho y demanda contra parlamentario Croes.
E noticiero ta indica cu despues cu e parlamentario a tende e declaracion di prome minister, Croes a reacciona bisando “Mi a ricibi conseho for di e ultimo persona cu mi lo ricibi conseho den bida. Pero el a conseha mi y el a bisa mi cu mi tin di bay pidi dispensa pasobra mi a difama su nomber, pasobra e no ta aparece den e registro ni den e lista di accionistanan di ningun compania cu nos a menciona awe mainta. Y mi ta referiendo na Minister President. Nos lo tin cu bis’e ora dispensa cu e no ta doño, cu e no tin ningun beneficio y su nomber no ta aparece ningun caminda. Pueblo lo husga si nan ta kere of no, si su nomber ta bin un caminda of no, of si e no ta hereda nada despues na final.”
Tocante e reaccion aki e portal a acerca Wever-Croes pa sa si e ta bay haci denuncia ainda despues di e declaracion di parlamentario Croes of si e ta considera cu e declaracion cu e parlamentario a haci como un dispensa berdadero, riba cual, e mandatario a contesta e noticiero: “Mi ta reuni cu mi abogadonan mas laat awe”.
