Relaciona cu dia 21 di mei Dia Mundial di Diversidad Cultural pa dialogo y desaroyo, Departamento di Cultura hunto cu Artisa a organiza e Encuentro Multi-Cultural cu Feria Gastronomico y Show multicultural.

Esaki a tuma luga dilanti Nicolaas Store na San Nicolaas. Un multitud grandi representando diferente nacion na nos Pais a asisiti na e evento pa apoya y disfruta di e cumindanan di varios pais y e show multicultural. Un total di mas di 25 presentacion di sea canto, baile, musica, poesia a presenta e cultura di cada pais.

Minister di Cultura Sra. Xiomara Maduro tabata presente y a hiba e siguiente discurso na tur esnan presente.

“Awe nos ta celebra e rikesa multicultural cu nos tin na nos Pais Aruba. Un anochi riba cual nos ta bay disfruta di un intercambio cultural di varios talentonan den forma di musica, baile y expresionnan artistico.

Mi ta contento di por mira un publico grandi na e di cuater Encuentro Multicultural pa celebra e Dia Mundial di Diversidad Cultural pa Dialogo y Desaroyo cu ta wordo observa 21 di mei.

Tabata na aña 2001 cu UNESCO a declara pa dia 21 di mei como Dia di diversidad cultural y na aña 2003 Nacionnan Uni a declara 21 di mei oficialmente como Dia Mundial di Diversidad Cultural pa Dialogo y Desaroyo.

UNESCO y Nacionnan Uni ta confia cu si den cada pais por trece diferente cultura hunto, cu esaki ta contribui na paz, desaroyo positivo y stabilidad social den e Pais.

Cu pa medio di dialogo, comunica cu otro y inclusion, un Pais por logra biba den paz, harmonia y cu respet pa otro.

Awenochi Pais Aruba ta uni na e iniciativa di Unesco y Nacionnan Uni pa experiencia un bunita show di intercambio cultural, durante cual nos ta bay duna atencion na nos cultura y cultura di tur otro nacion cu ta biba hunto cu nos.

Nos Pais ta brinda hogar na mas cu 90 nacionalidad di mas cu 130 pais. Segun Oficina Central di Estadistica Aruba, durante e Censo na aña 2020, a constata cu 37% di e poblacion di Aruba, ta personanan di otro nacionalidad. Esaki ta demostra cu apesar cu nos ta un pais chikito, nos Pais ta cas di varios nacionalidad, di diferente cultura, tradicion, balor y custumber cu ta biba den paz y harmonia cu otro. Laga nos haci uzo di e dia aki tambe pa reflexiona riba e balornan di diversidad cultural, riba e importancia di dialogo intercultural, pa compronde y respeta cultura di otro. Fomenta igualdad, siña di otro y biba den union pa fortalece nos Pais Aruba.

E ‘Encuentro Multicultural ‘aki ta un bunita iniciativa pa asina por comparti rikesa di cada cultura di diferente Pais. E evento ta brinda un plataforma pa nos duna atencion na e diferente nacionnan cu ta biba aki y bini hunto y comparti cu nos comunidad nan cultura y talentonan artistico. Mi ta hopi orguyoso di tin asina tanto potencial artistico di diferente nacion cu a bin residencia na Aruba.

E fecha 21 di mei tambe ta un fecha historico pa pueblo di Aruba, ya cu riba e fecha aki 21 aña pasa, Aruba a oficialisa nos idioma materno Papiamento. E idioma Papiamento ta locual ta uni nos y diferente otro nacionalidad cu a bin residencia aki.

Mi ta haci uzo di e oportunidad aki tambe pa gradici un y tur cu a participa di un of otro forma, pa nan interes, esfuerso, trabou y aporte cu a ser haci pa awe nochi, pa asina nos por disfruta di un tremendo intercambio cultural.

Un palabra di gratitud na Departamento di Cultura, en especial e lider di e proyecto sr. Jhon Freddy Montoya cu ta traha incansablemente y cu hopi pasion, y tambe Artisa pa haci e evento aki posibel na San Nicolas.

Danki tambe na tur e miembronan di Cuerpo Consular na Aruba y Fundacionan cu semper ta participa pa asina por realisa e encuentro multicultural aki.

Ban Sigui fomenta inclusion y integracion, ban sigui biba na paz, den trankilidad, cu harmonia y den union.

Na tur cu a haci Aruba nan cas, danki pa tur locual boso ta aporta cune na bienestar di nos Pais Aruba. Laga nos sigui traha den amistad y union pa fortifica nos Pais. Nos diferencia ta locual ta enrikece nos y nos respet ta locual ta uni nos.

Disfruta di e Encuentro Multicultural, un bunita forma pa comparti y experiencia cultura di tur nacion. Paso… ‘Cultura bo tin cu bib’e’!”