Ministerio di Husticia conhunto cu Aruba Airport Authority N.V. (AAA) tin e placer pa anuncia cu Sr. Rein Hulst, cu actualmente ta fungi como Manager of Emergency Response na Schiphol Airport, lo keda asigna na AAA y na mes momento lo keda asigna na Management Team di Dienst Brandweer Aruba cuminsando desde 1 di juli 2024. Prome cu e fecha aki, Hulst lo inicia cu algun trabou preparatorio den consulta cu Dienst Brandweer y AAA.
Manera ta conoci, for di dos aña pasa Ministerio di Husticia a percura pa diferente inversionnan adicional pa Dienst Brandweer Aruba. E inversionnan aki tabata encera inversionnan infrastructural, pa adkiri material necesario pa e trahadornan, inicia opleidingen atrobe y tambe compra di trucknan nobo. Na mes momento tin un plan integral tambe pa loke ta ekipa y reenforsa e management team di Dienst Brandweer Aruba, pa asina ehecuta e hallazgonan di e audit cu a wordo haci aña pasa, pa asina Aruba como pais por cumpli cu normanan y reglanan vigente. Y pa logra esaki a aloca tur e fondonan necesario.
UN paso significante pa logra e cambionan desea ta e adkisicion di Sr. Rein Hulst na AAA, facilita pa Royal Schiphol Group. Esaki ta subraya un esfuerso di colaboracion entre Gobierno di Aruba y AAA pa mehora e capacidadnan di “emergency response” na Aeropuerto di Aruba. Rein Hulst lo uni na e management team di Dienst Brandweer Aruba. Su funcion lo ta pa brinda orientacion, sosten y yuda na e implementacion di e plannan di mehoracion den un esfuerso di team cu e demas miembronan di management team. E participacion di Rein Hulst lo ta fundamental pa eleva e standardnan di e “emergency response” y servicio di paga candela y pa garantisa su aliniacion cu e rekisitonan tanto internacional (OACI) como local (AUA-AGA).
Hulst su experiencia amplio den “emergency response management”, conhuntamente cu su trayectoria comproba na Royal Schiphol Group como Manager Emergency Response, ta hacie ideal pa sostene Gobierno di Aruba pa logra su metanan di cumpli cu e rekisitonan local y internacional.
“Nos ta masha contento pa yama bonbini na Rein Hulst na e management team di Dienst Brandweer Aruba”, asina Minister di Husticia Rocco Tjon a expresa. “Su experiencia ta di gran balor p’asina duna impulso na nos esfuersonan pa cumpli y supera e standardnan internacional y local pa “emergency response” y servicio di paga candela na aeropuerto. Nos ta spera di por probecha di su experiencia, conocemento y liderazgo pa mehora e siguridad di nos aeropuerto y comunidad di Aruba ainda mas”.
“Mi ta hopi contento cu Rein lo comparti su experiencia cu e management team di Dienst Brandweer Aruba”, tabata palabra di Joost Meijs kende ta CEO di AAA. “Un operacion sigur di aeropuerto ta crucial pa AAA y comunidad di Aruba, y su asignacion lo yuda pa cumpli cu e standardnan local y internacional di un manera structura”.
Ta premira cu Rein Hulst su servicio lo dura un periodo di dos aña, durante e tempo aki e lo ta staciona na Aruba. E iniciativa aki di colaboracion ta subraya e compromiso di tur esnan involucra pa fortalece e capacidadnan pa atende cu e “emergency response” na aeropuerto y garantisa e standardnan di mas halto di siguridad p’e localnan y e bishitantenan di Aruba.
