Diasabra 7 di october 2023 pa 7or di mainta tin Santa Misa na Kapel di Alto Vista y Den Kapel di Cas Curason di Maria na San Nicolas (Blue Army).
Prome cu Santo Eucaristia ta resa Santo Rosario cuminsa pa 6.15 “Misterio Gososo”, despues ta sigui cu Salve Regina. Ta invita henter e pueblo, devoto y fielnan pa asisti na e Santa Rosario prome cu misa. Luna di october ta luna di Mama Maria, E ta intersede pa nos na nos Tata Celestial. Tur fielnan di Mama Maria ta bin resa e Santo Rosario pa bienestar di henter comunidad di Aruba. Papa Francisco ta haci un suplica na mundo henter pa resa e Santo Rosario, nos ta den un tempo di crisis grandi, hopi no ta weita cu nos ta den un tempo crucial cu nos no ta mira e fin.
Aki na Aruba ya nos ta sinti e cambio di clima. E cayente di e solo ta afecta nos tur dia. Den e tempo aki cu malesanan ta invadi humanidad. Laga cu nos ta mas consciente cu nos mester di oracion. Mama Maria a bisa e 3 muchanan di Fatima dia 13 di october, “Ami ta La Birgen di Rosario. Mi a bini pa spierta hende pa drecha nan bida, no haci Dios bira tristo pa via di pica (ya cu Dios ta sufri tanto caba pa pica di hende), resa Santo Rosario tur dia y haci penitencia pa nan pica.” Cu cara tristo y suplicante La Virgen a papia e palabranan cu a haci mas impresion ariba Lucia. “Laga hendenan stop di ofende Dios; ya nan a ofend’E di mas caba.” Na ocasion di delaster aparicion, mas o menos setenta mil hende tabata testigo.
Laga nos ta resa pa necesidad di Iglesia Universal, pa Papa Francisco, Obispo Luis Secco, tur sacerdote, Diacono y laiconan cu ta hiba e bon noticia pa e pueblo di Dios. Pa nos Gobernantenan y tur cu ta carga responsabilidad pa nos pais Aruba. Pa enfermonan den exterior cu a bay busca nan salud. Pronto lo ta na Aruba y gosa di un bon salud.
