Minister Maduro ta contesta preguntanan di parlamentario Marisol Lopez

Ayera mainta ariba su pagina di Facebook minister di Finanzas y Cultura, Xiomara Maduro, a publica un carta den cual e ta contesta preguntanan cu el a ricibi durante siman for di parlamentario y lider di fraccion MAS, Marisol Lopez, tocante cuenta anual di 2019 y su maneho como minister di Finanzas.

Parlamentario Lopez a puntra e mandatario entre otro, kico ta e motibo pa e tardansa pa entrega cuenta anual di 2019 na Parlamento. Minister Maduro a indica cu e retraso ta debi na un carga mas grandi di rapportnan cu un capacidad reduci. Esaki ta aplica tanto den e parti di administracion, di unda e datonan ta bin, como tambe pa esnan cu ta encarga directamente cu e elaboracion di e rapportnan.

Lopez a puntra e mandatario si e ta capaz di dirigi su departamento di Finanzas y si e director di dicho departamento por cumpli cu e palabracionnan haci. Na esaki e mandatario a contesta si y a splica cu nan a indica cu nan a acorda un ampliacion di capacidad den departamento di finazas, locual ta bay permiti pa recupera e retrasonan den e cuentanan anual den un futuro no hopi leu.

Lopez a puntra tambe den cuadro di un reaorganisacion di departamento di Finanzas, cual posicionnan lo wordo crea y cualnan lo wordo elimina. Minister Maduro a splica cu e actualisacion di e departamento ta un proceso cu ta sucede den diferente fase como resultado di e investigacionnan cu ta tuma luga. El a indica cu nan a introduci un modelo ‘3 lines-model’ pa control interno y el a aclaria cu e ta hopi prematuro pa indica ki implicacionnan esaki ta trece.

E parlamentario a puntra tambe tambe con e reorganisacion aki ta fit den e supervision financiero den forma di Rijkswet cu lo wordo firma y ken tin e tarea pa produci e cuantanan anual di pais Aruba y pakico tin contratiempo.

Minister Maduro a splica cu e supervision financiero a traves di un Rijkswet cu ainda mester wordo negosha no ta bay ta mucho diferente di e supervision actual cu tin a traves di e LAft. Y contestando e ultimo pregunta, e mandatario a indica cu e produccion di e cuentanan anual di pais Aruba ta tarea di departamento di finanzas y a referi na su contesta anterior unda el a splica cu e retraso ta debi na un carga mas grandi di rapportnan cu un capacidad reduci, cual ta aplica na e parti di administracion, di unda e datonan ta bin, como tambe pa esnan cu ta encarga directamente cu e elaboracion di e rapportnan.