Pa motibo di un potret publica riba rednan social a cuminsa un controversia relaciona cu organisacion di un festival cu lo a mester tuma luga e fin di siman aki na Bushiri. A resulta cu cerca di stage tin un neishi di Shoco, cual ta un di e especienan protegi pa ley na Aruba. Despues di e descubrimento, ayera organisadornan di e festival a anuncia e cambio di ubicacion di e festival.

Diamars ultimo, un usuario riba Facebook a publica e potret unda ta mustra e stage di festival Flip Flop, mustrando cu tabatin un neishi di Shoco hopi cerca di stage, rondona pa cabuya y cu un borchi marcando e lugar unda e neishi ta. E imagen aki causa un conmocion den comunidad mirando cu diferente artista internacional ta invitado pa e evento aki, pa loke por spera un publico grandi cu por afecta e Shoco su habitat y su trankilidad.

Pa esaki, Aruba Conservation Foundation (ACF) a duna su band’i medaya, caminda nan a publica un comunicado indicando cu pa algun tempo caba nan tabata na altura di e neishi di Shoco localisa na Bushiri. ACF a bisa cu den preparacion pa e festival aki, ACF y Aruba Birdlife Conservation (ABC) a haya e notificacion di un stage instala na un distancia hopi cortico di unda e neishi ta, y mesora a actua pa pone un extra borchi y cabuya pa indica e area y limita acceso. Tambe nan a drenta den contacto cu organisadonan pa motibo cu nan sa cu esaki no ta suficiente pa proteha e neishi.

Nan tabata den palabracionnan pa por yega na un solucion faborabel pa ambos parti, mirando e magnitud di e evento y naturalesa na otro banda. E palabracionnan aki tabata andando ya pa varios siman.

Riba e pregunta si por hala e neishi, e contesta ta cu no pa motibo cu ACF mester di minimo 3 siman pa reloca un neishi di Shoco den un manera mas natural posibel.

Ayera, organisadonan di FlipFlop a convoca un conferencia di prensa urgente pa asina anuncia cu nan a logra cambia e ubicacion di e festival. “Respetando naturalesa y nos beachnan, organisadonan a consulta mesora cu ACF pa haya un solucion cu lo sirbi miho pa e Shoco local. Despues di negociacionnan exitoso nos ta anuncia cu nos ta cambia di sede di Bushiri Arena pa Harbour Arena,” segun Elite, e compania organisador, a anuncia.

Na aña 2017 a pasa e Landsbesluit di Bescherming Inheemse Flora & Fauna. Den e ley aki a duna proteccion na un lista di especie, den cual e Shoco tambe ta inclui. Conforme e ley aki y e Natuurbeschermingsverordening, ta prohibi pa mata of herida e Shoco y tambe pa kibra su neishi y/of e webonan, pa captur’e of strob’e den su trankilidad. No ta conoci e detayenan di e permiso original cu a otorga na organisadornan di e festival FlipFlop, ni si esaki ta tene consideracion cu por tin neishi di Shoco den e area.