(AP)—Polis a controla e oficinanan y residencia di un empleado di parlamento Europeo ayera como parti di un investigacion den si legisladonan di Union Europeo a ser soborna pa promove propagando Ruso pa sovaca apoyo pa Ucrania, fiscalnan a bisa.
Solamente algun dia prome cu e eleccionnan Europeo, e oficina di fiscal federal di Bruselas a bisa cu control ta tumando luga na e apartamento di e empleado na Bruselas. Su oficinanan parlamentario den e capital di UE y na Strasbourg, unda e oficina parlamentario Europeo ta situa na Francia, tambe a ser controla.
Autoridadnan Belga y Frances, den partnership cu e agencia di cooperacion hudicial Eurojust, a conduci e operacion. Eleccionnan den henter Europa pa scoge un parlamento UE nobo ta plania pa dia 6 te cu 9 di juni.
Prome minister Belga Alexander de Croo a anuncia un investigacion luna pasa, bisando cu e servicio di inteligencia di e pais a confirma e existencia di un red purbando di socava apoyo pa Ucrania.
“E controlnan ta parti di un caso di intervencion, corupcion pasivo y miembresia di un organisacion criminal y ta relaciona na indicacionnan di intervencion Ruso, unda miembronan di e parlamento Europeo a ser acerca y paga pa promove propagando Ruso via e website noticiero The Voice of Europe,” fiscalnan a bisa.
Nan ta bisa cu nan ta kere cu e empleado a hunga “un rol significante den esaki.” Varios agencia noticiero a identifica e sospechoso como Guillaume Pradoura, un empleado pa legislador Europeo Marcel de Graaff di e partido ultraderechista Hulandes Forum voor Democratie (FvD). Un persona cu conocemento di e investigacion a confirma cu e reportahenan ey tabata corecto. E oficial no tabata permiti pa papia publicamente pasobra e investigacion ta andando.
De Graaf a bisa riba X cu e y Pradoura no a ser contacta cu autoridadnan. “Pa mi, esaki ta bin como un sorpresa completo,” el a bisa. “Tambe, mi no tin ningun envolvimento den e supuesto operacion di desinformacion Ruso. Mi tin mi mesun creencia politico y mi ta proclama nan. Esaki ta mi trabao como parlamentario.”
Den pasado Pradoura a traha pa Maximilian Krah, e top candidato di e partido ultraderechista Aleman, Alternative for Germany, den e eleccion Europeo otro luna, ken recien a ser prohibi pa su partido pa campaña.
Krah ya ta enfrentando critica despues cu autoridadnan na Bruselas a controla cu oficinanan na e parlamento Europeo den conexion cu un di su assistent ken a ser deteni luna pasa riba sospecha di spiona pa China.
Krah a bisa den un mensahe publica riba X cu ningun di su oficina a ser controla. “E ex-empleado en cuestion tin tempo ta trahando pa un otro parlamentario,” el a bisa.
E luna aki UE a prohibi Voice of Europeo y tres otro media Ruso di locuta den e bloc. UE a bisa cu nan tur tabata bao control di Kremlin y tabata atacando riba “partidonan politico Europeo, specialmente durante periodonan di eleccion.” Desde cu e guera a cuminsa na februari 2022, UE ya a suspende Russia Today y Sputnik, entre otro media.
De Croo a bisa luna pasa cu e investigacion a mustra cu miembronan di parlamento Europeo a ser acerca y a ofrece nan placa pa promove propaganda Ruso. “Segun nos servicio di inteligencia, e metanan di Moscu ta hopi claro. E meta ta pa yuda eligi mas candidato pro-Ruso pa e parlamento Europeo y pa reenforsa un cierto narativa pro-Rusia den e institucionnan ey,” el a bisa.
“E meta ta hopi claro: un apoyo Europeo zwak pa Ucrania ta sirbi den fabor di Rusia riba e tereno di bataya y cu e ta meta real di loke a ser revela den e ultimo simannan,” el a agrega. Nacionnan den UE a aloca biyones di euro den Ucrania, hunto cu un cantidad di arma y municion. Tambe nan a pone sancion riba oficialnan Ruso, incluyendo presidente Vladimir Putin, banconan, companianan y e sector energetico desde e invasion di Moscu riba Ucrania na februari 2022.
