El Salvador: Ta denuncia vulneracion na libre expresion

(DW) – Un grupo di organisacionnan no gubernamental a registra por lo menos 31 caso di vulneracion na diferente derechonan humano –e mayoria di nan na libre expresion- na El Salvador entre januari y april 2024, di acuerdo cu datonan presenta diamars ultimo y comparti pa Fundacion di Estudionan pa Aplicacion di Derecho (FESPAD).

E casonan a ser registra den un plataforma di monitoreo di espacio civico lidera pa FESPAD, cu e cual ta busca monitoria, sitematisa y denuncia e condicionnan cu ta afecta derechonan humano y e normanan cu ta limita e labor di NGO’s na e pais centro Americano, segun e entidad a señala.

Estadisticonan ta indica cu 61.3% di e casonan registra ta coresponde na vulneracion di libra expresion, 22.6% na libertad di asociacion y 16.1% na derecho di reunion pacifico.

Pa loke ta trata e personanan afecta, segun e organisacion ta señala, esnan cu ta eherce periodismo ta representa e mayor number di casonan cu 58.1% despues ta sigui organisacionnan di sociedad civil cu 12.4%, representantenan sindical 9.7%, integrantenan di partidonan politico 9.7%, personanan defensor di derechonan 6.5% y manifestantenan 3.2%.

Funcionarionan publico ta figura como e agresornan mayor cu 51.6% y despues ta sigui agentenan di Polis Nacional cu 29%.

Organisacionnan cu ta haci impulso di e plataforma ta señala cu den ultimo añanan a identifica “bareranan” den ehercicio pleno di derechonan “den espacio fisico” asina como e “disminucion di espacionan di dialogo, obstruccion di labor periodistico, criminalisacion di organisacionnan di sociedad civil y defensornan di derechonan, ademas di obtaculisacion pa legalisacion di organisacionnan no gubernamental.” Pa loke nan a pidi Estado pa tuma medidanan pa stop e violacionnan na derechonan y garantisa e respet na libertad fundamental di e poblacion Salvadoreño.

Den iniciativa aki di FESPAD ta acompaña e Servicio Social Pasionista (SSPAS) y Asociacion di Periodistanan di El Salvador.

E cifranan registra den e plataforma a ser presenta dianan prome cu e presidente reeligi Nayib Bukele lo asumi su funcion pa su di dos mandato consecutivo, a pesar cu ta prohibi pa Constitucion, despues di logra su reeleccion dia 4 di februari ultimo cu un apoyo electoral amplio.