(AP)—Finalmente un horcan a move for di Filipinas, lagando al menos shete persona morto, mayormente debi na inundacion of matanan tumba, y forsando e ciere di varios waf, lagando miles di pasahero pega, segun oficialnan a bisa diamars.
Horcan Ewinair a pasa riba e costa di e pais diabierna anochi y a keda pa varios dia, prome cu el a move bay den direccion noreste, halando leu for di e archipelago. Tur advertencia di tormenta a ser kita ayera.
E cambio di direccion di e horcan a spaar e capital densamente pobla, Manila, for di un golpi posiblemente significante. Ewinair, localmente conoci como Aghon, a ser registra ayera aproximadamente 450 kilometer este di e pueblo Basco den e provincia di Batanes cu bientonan sosteni di 130 kph y rafagnan di te cu 160 kph, segun e pronosticadornan gubernamental.
Al menos seis pueblano a hoga den inundacionnan of a muri despues cu matanan tuma a dal nan durante e diluvio den e provincia Quezon, segun polis provincial. Den e provincia Misamis Oriental, un peublano a muri ora un mata a cay y a dal un taxi riba cual e tabata coriendo cu su ruman muhe mientras nan tabata bayendo scol, polis a bisa.
Hopi pueblano tabata ansha pa e inundacionnan. Algun areanan a ser inunda te cu ocho meter na Lucena, e capital di e provincia Quezon. E inundacion tabata parcialmente debi na sistemanan di riool cu tabata pega despues di un temporada berano extra calor, segun e gobernador di Quezon, Angelina Tan, y otro oficialnan provincial a bisa.
Tan a bisa cu hopi cas, incluyendo e residencia di e gobernador, a haya daño pa bientonan fuerte y yobidanan torencial. E horcan a fors’e pa busca refugio otro caminda mientras e ta encarga di e distribucion di cuminda y otro ayudo na pueblanonan desplasa, el a bisa.
Prome cu el a bula bay Brunei ayera pa un bishita estatal, presidente Ferdinand Marcos Jr. a bisa cu mas cu 26,700 hende a ser afecta pa e horcan, incluyendo hopi cu a huy pa centronan di evacuacion den cinco region provincial. Tres aeropuerto y 29 waf no por a opera normalmente debi na e horcan mientras cu seis ciudad y pueblo a ser afecta pa perdida di coriente, el a bisa.
Mas cu 4,800 pasahero, chauffeur di truck y ayudantenan di carga a keda pega debi na e ciere di waf mientras e horcan a afecta e provincianan pazuid y central, segun e warda costa Filipino. “Hasta prome cu e horcan a dal, nos a transporta material di alivio den luganan cerca di e ruta di e horcan, pues nos tabata full cla caba,” Marcos a bisa.
Aproximadamente 20 horcan y tormenta cada aña ta dal e archipelago Filipino, cual tambe ta situa den un region Asiatico cu frecuentemente ta ser afecta pa teremoto y erupcionnan volcanico, haciendo e un di e paisnan mas vulnerable pa desasternan natural.
Na 2013, Horcan Haiyan, un di esunnan mas fuerte registra, a laga mas cu 7,300 persona morto of desaparecido, a tapa henter pueblonan, a pusha barco paden y a desplasa mas cu 5 miyon hende den centro di Filipinas.
