Tabata dia 18 di mei cu Comerciantenan Uni a mustra nan preocupacion pa loke ta trata Aruba Fair Trade Authority na unda den un conferencia di prensa nan a sigura cu “Gobierno no por competi cu sector priva y stipula prijs den comercio,” sinembargo, minister di Asuntonan Economico a indica cu CUA por entrega un keho pa AFTA cuminsa investiga.
“Si dos compania na Aruba stipula un prijs halto pasobra nan so ta bende un producto, nan no mag esey, esey ta algo cu nan a bin pa controla y no ta malo pa comunidad, pero pa ken esaki ta conta? E ta conta no solamente pa tur e comerciante na Aruba pero tambe ta conta pa companianan di gobierno tambe,” Frans Ponson presidente di Comerciantenan Uni (CUA) a bisa.
Ademas Ponson tambe a señala cu “prome cu bo kier bin den comercio, bin stipula si comerciantenan ta haci malo, nos ta haya cu bo tin cu wak den bo mesun seno prome, cu ta seno di gobierno, pasobra laga nos cuminsa papia riba SETAR, nan ta doño di Telearuba, ta doño di cabel por ehemplo, di companianan priva cu nan ta cumpra, nan a cumpra un compania di IT masha grandi mes cu ta ITP Caribbean, nan ta invertiendo den camara, aworaki bo tin destaho publico cu SETAR cu ta bay pa destaho publico di camara y gana contra e comerciantenan cu nan ta bendiendo camara, nan ta cumprando tur e companianan local cu ta algo inhusto,” el a sigura.
Pa esaki, minister di Asuntonan Economico, Comunicacion y Desaroyo Sostenibel, Geoffrey Wever recientemente tabatin un reunion cu AFTA pa papia di diferente topico entre otro, funcionamento di AFTA y ampliacion di nan cuadro legal pa inclui e proteccion di consumidor na unda e ley ta casi cla y asina nan por actua riba esaki tambe.
Tocante e topico di Comerciantenan Uni, minister Wever a señala cu AFTA ta un entidad huridico cu ta riba distancia di gobierno “a mi como minister di Economia mi ta responsabel pa AFTA pero mi no tin e autoridad pa bisa nan kico pa haci y kico no pa haci, nan mes tur investiga tur posicion cartel, abuso di mercado, nan por investiga tal compania cu por ta violando ley di competencia husto na Aruba y e ora nan ta investiga y nan por actua segun instrumentonan legal cu nan tin.” El a sigura.
E ta un sistema huridico pero e minister den e caso aki, su poder ta limita y nan a empodera nan y percura pa e cuadro legal t’ey, nan a institui nan y nos ta percura pa nan tin fondonan pa traha y pa tin cierto autoridad cu minister no por eherce manera nan forma di opera ta completamente independiente y por ehemplo, “den e caso specifico aki, Sr. Ponson tabatin hopi critica riba e funcionamento di SETAR y tabata bisa cu e tin un discrepancia di AFTA cu SETAR y mi tin cu bisa cu AFTA tambe tin e autoridad pa haci un investigacion eynan, si e reclamo di Sr. Ponson ta valido, nan por entrega un keho na AFTA y e ora nan por investiga.”
Ademas, minister Wever a indica cu desde cu AFTA a ser institui tin hopi keho cu e ser entrega door di companianan y ciudadanonan ya cu segun nan, e mercado tin companianan cu ta violando e reglanan di competencia husto y nan tin cu dicidi cua compania lo investiga prome y unda e prioridadnan ta.
“Si e ponencianan di Sr. Ponson ta corecto, e of su organisacion por entrega un keho y AFTA mester bay investiga, si na dado momento lo investiga SETAR, a mi como minister no por interveni, mi no mag di interveni y si por ehemplo mi yama e bestuur pa nan no investiga SETAR, nan no mester sigui mi peticion pasobra ley no ta duna mi autoridad , a nan tin e autoridad pa dicidi na ken y con ta investiga,” minister Wever a comenta.
Pa minister Wever esaki ta un “game changer” pa motibo cu paisnan rond di mundo ora cu nan a introduci nan autoridad di competencia husto, e resultado tabata ta cu semper prijs ta baha y nivel di servicio ta subi y innovacion ta subi, na Hulanda tambe a pasa e trayecto aki den tur e sector y e ta algo exitoso “y a mi ta kere cu informacion di comunidad empresarial ta tumando luga, no lo ta algo cu por haci di awe pa mañan, e ta un proceso.”
Den un simposio cu a tuma luga recientemente di AFTA unda nan ta purba di trece mas conscientisacion “esaki ta algo cu nan ta haciendo y nos a touch e topico aki tambe den reunion cu lo ta bon pa tin mas conscientisacion unda nan por ta un tiki mas presente aunke nan tin un campaña di PR pero mi ta kere cu nan mester hisa e velocidad pa comunidad compronde mas miho con AFTA ta organisa.”
AFTA a ser institui door di minister Wever y a bira operacional 1 di januari 2024 cu e meta pa promove competencia husto entre empresanan y pa garantisa un desaroyo economico y stipula regla encuanto acuerdonan cu ta limita competencia (mededingingsafspraken) y posicion di poder (machtspositie), como tambe stipula regla pa cu supervision riba concentracion di empresanan.
E ley di competencia husto (mededingsverordening) tambe a drenta na vigor 1 di januari 2024 y por ehempel ta prohibi pa tin cartel of otro acuerdonan entre comerciantenan cu ta perhudica competencia husto, ademas AFTA ta un entidad cu ta opera independiente di gobierno di Aruba cu tin su mesun autoridad y herment pa actua.
Segun a informa AFTA ta responsabel no solamente pa lo cual ta stimula competencia husto den mercado, pero tambe lo contribui na proteha nan consumidornan contra practicanan inhusto den comercio, y educa nan riba nan derechonan, e intencion ta cu pa 2025 AFTA lo tin e responsabilidad adicional pa regula y informa riba tereno di proteccion di consumidor.
E bestuur di AFTA ta consisti di Sr. Roly Sint Jago como presidente, Sr. M. Snoep y Sr. M.Visser como miembro, Sr. Snoep ta tambe presidente di e autoridad di competencia husto na Hulanda cu ta ACM.
