(AP) — Hefe di Red Bull, Christian Horner a expresa su sorpresa cu e decision di Formula Uno di blokea e intento di Andretti Cadillac pa join e serie a alcansa Congreso Mericano.
E siman aki, seis senador Mericano a pidi Departamento di Husticia pa examina si e decision di F1 pa stop Andretti Cadillac di bira e di 11 team di F1 ta viola algun ley anti-competencia.
“Mi tabata sorprendi pa mira cu Andretti a bay den e proceso aki, pero cu speransa si realmente nan kier haya un manera pa subi e grid nan ta bay hay’e,” director di team, Horner a bisa riba diabierna na e Monaco Grand Prix. “Mi ta kere e solucion mas natural ta pa nan adkiri un frankisia existente si tin un hende cu kier bende.”
GM, bao su marca Cadillac, ta parti di e esfuerso Andretti Cadillac cu a keda rechasa pa Formula One Management den su solicitud pa expande e grid di F1. Maske e oferta di Michael Andretti a keda aproba pa cuerpo gobernante di motorsport, FIA, FOM despues a rechasa e aplicacion pa join na 2025 of 2026 pasobra no a kere cu Andretti lo ta competitivo.
FOM a suavisa su posicion cu un promesa pa reconsidera e aplicacion na 2028, ora GM tin un motor cla pa competi.
Horner a bisa cu e “absolutamente” ta duna bon bini na Andretti y Cadillac den F1. Michael Andretti, kende tabatin 13 careda como piloto di F1, ta yiu di campeon mundial di 1978, Mario Andretti.
“Andretti tin un tremendo herencia di careda. Mario ta un leyenda di e sport. Y claro, Cadillac ta un fabricante enorme di automotor for di Merca,” Horner a bisa. “Mi ta kere cu pa protege e frankisianan existente y e stabilidad cu nos tin den e deporte, e ora e meta ta pa adkiri un di e teamnan existente.”
Un ehempel di esaki ta con Sauber ta bay join cu Audi pa un entrada den F1 na 2026.
“Audi ta mustra e caminda corecto pa bin den Formula 1. Claro, Cadillac ta un actor grandi y ta cualifica e proyecto aki como un proyecto potencialmente bon,” representante di team Sauber, Alessandro Alunni Bravi a bisa ayera. “Pero tin un caminda cu ta pa cumpra un team existente y mi ta kere cu e proceso poni pa Formula 1 ta uno claro. Un proyecto hopi robusto. Pues mi ta kere cu nan sa cua lo por ta e manera (corecto).”
Horner a rechasa cualkier nocion cu tin un agenda contra Andretti y tambe a elogia con propietario Mericano di F1, Liberty Media, a tanto crece e serie como haci e teamnan mas fuerte.
