(El Tiempo) – E situacion di orden publico na Cauca ta sigui bao presion. Ademas di atentadonan di 20 di mei ultimo cu a agita Jamundi, un zona rural di Suarez, na Cauca, na e momentonan aki Ehercito y disidencianan di FARC ta bao fuego crusa.

E mesun 20 di mei, frente “Jaime Beltran”, disidentenan di FARC bao mando di Ivan Mordisco, tambe a ataca un instalacion militar, pa loke a genera e desplasamento di 350 persona na e coregimento di La Toma.

Debi cu e enfrentamento entre disidentenan y Ehercito ta continua, e campesinonan mester a busca refugio den un misa cristian. Nan tin mas cu 72 ora di aislamento, wardando pa e momento cu tiramento lo stop.

E lider Silvio Chara a bisa cu e poblacion ta den alerta, sperando pa haya sa na ki momento autoridadnan lo duna garantia di seguridad pa nan por bay back na nan cas.

Den e misa, nan a ricibi ayudo, manera cuminda y corchonnan pa muchanan, hende muhe, hende grandi pa nan por continua keda den e refugio improvisa.

“Ora combatenan a cuminsa, hende tabata core pariba y pabou, hendenan ta hopi nervioso.” Un di nan a señala.

Hopi di e personanan cu a busca refugio ta pertenece na comunidadnan Afro-Colombiano cu ta bao guia di loke nan ta yama ‘Guardia Cimarrona.’

Di acuerdo cu nan, mientras e atake tabata sucede na warda di Polis di Morales na Cauca, tambe un puesto militar na zona di La Toma tabata bao atake.

Aumento di terorismo cu disidencia di Ivan Mordisco a cuminsa 17 di mei ultimo cu explosion di un artefacto na un caretera na Miranda, Cauca, e cual a laga como consecuencia un mucha y un homber morto, a reactiva esaki back den oranan di marduga di 20 di mei cu atakenan nobo na e departamento ey y na El Valle lagando dos polis y dos civil morto.

E victimanan fatal nobo tabata na Morales, Cauca ora warda di Polis di e municipio ey tabata bao atake door di disidentenan.

Un persona cu tabata deteni den e warda di polis, un civil y dos polis a perde nan bida debi na explosivonan denomina como ‘tatuco” cu a ser instala den un truck cu tabata para cerca di un parke.

Autoridadnan di e dos departamento, den aña aki a soporta 17 atake y atentadonan terorista di disidencia cu ta laga den total cuatro civil y nuebe polis asesina, nan a pidi na Gobierno Nacional pa intensifica e presencia den region y stop e violencia di disidencianan.

Autoridadnan a ofrece un recompensa di hasta 500 miyon peso pa seis lider di disidentenan di frente Jaime Martinez, entre nan alias ‘Marlon’.