Investigacion di e situacion financiero na SABA a drenta su fase final. Asina Minister Arends di Asuntonan di Adulto Mayor a duna di conoce den un comunicado di prensa.

Pa hopi aña a existi un diferencia di opinion entre Gobierno di Aruba y directiva di SABA cu ta un fundacion cu ta atende cu cuido di nos adultonan mayor. Gobierno di su banda no tawata tin un bista cla riba e situacion financiero di e fundacion y con e fondonan publico ta wordo maneha. Tambe tawata tin diferencia di opinion pa loke ta e tareanan di e fundacion.

E discusion aki a pasa den diferente gabinete sin cu por a yega na un solucion. Esaki a causa hopi incertidumbre tanto pa e trahadonan como e clientenan di SABA. E situacion aki no por a sigui asina y di banda di Gobierno Minister Arends a dicidi encarga partidonan externo pa haci un investigacion intensivo y amplio, pa asina yega na resolve e diferencia cu tin entre e partidonan.

Di nan banda SABA a reforsa nan Raad van Toezicht pa asina yuda resolve e situacion. Trahando hunto Gobierno, Raad y sindicato SEPPA a yega na un areglo cu a haci posibel cu prome cu fin di 2023 Gobierno a pone fondo disponibel pa asina SABA por cumpli cu pagonan atrasa na e trahadonan.

Trahando hunto tambe a logra alinea pa prome biaha den mas di un decada e vision di Gobierno y esun di SABA, pa loke ta e tareanan di SABA den e sector di cuido di adultonan mayor. SABA di su banda a apunta un director nobo cu ta comprende e vision pa loke ta tareanan di e fundacion y e tin como tarea pa duna forma y ehecuta esaki.

“Awo nos tin un fundeshi pa hunto cu SABA nos por sigui desaroya e servicionan pa nos grandinan,” segun Minister Arends a indica. Minister a splica cu e partidonan a yega na otro, pero ainda falta e rapport independiente di PKF, pasobra esaki lo yuda Gobierno y SABA comprende unda e situacion a bay robes den pasado.

“E rapport aki lo sirbi tambe como un guia pa nos tur, pa asina nos por sigui traha cu otro den harmonia den futuro y evita cu locual a sosode den pasado lo por bolbe ripiti,” segun Minsiter Arends. Minister Arends a informa cu e rapport ta den un fase avansa y cu tur partido ta cooperando debidamente. “Mi ta spera cu e rapport lo por ta cla entre augustus of september. Mi kier ta sigur cu e ta un rapport solido, pasobra nos mester pone un fin na discusion y sigura cu situacion di pasado keda den pasado”.