E proyecto di Kwashi di Curason ta un iniciativa di Fundacion Savaneta Prome Capital cu a cuminsa na luna di september di aña pasa, ya caba nan tin algun cas cu nan a verf y cu a bira un atraccion pa turismo, awor nan a anuncia cu nan ta bay sigui cu e proyectonan den otro casnan di e districto.

Asina presidente di e fundacion Norman Thijsen a anuncia recientemente den un conferencia di prensa, na unda ademas a bisa cu Savaneta 64 ta un di e prome cuatro cas cu nan a cuminsa verf. “Y si nos ta asina orguyoso cu pa hopi biaha nos ta pasa akinan back cu actividad cu nos ta organisa aki banda,” el a bisa.

Esaki ta di dos aña di e proyecto y ta algo cu ta cuadra cu e meta di e fundacion cu ta pa preserva e balornan cultural y historico, nan ta enfoca riba casnan cu tin entre 80 y 100 aña cu ta den e forma tradicional y nan kier rebiba e casnan aki back, pa esaki, Thijsen a sigura cu nan ta verf so, nan no ta restaura pa motibo cu esey ta un trabou di Stichting Monumentenfonds Aruba cu ta restaura autenticamente y a nan ta pinta e casnan cu colornan bibo pa embeyece e cas, e caya y e districto, nan ta kere cu asina nan ta traha riba e identidad cultural di Savaneta.

Nan a gradici nan sponsornan, un di nan ta SETAR e cual ta bay yuda nan pinta cuatro cas mas: Savaneta 181, Savaneta 65, Savaneta 16 y Savaneta 123-A cu colaboracion di nan boluntarionan, entre otro, Marinierskazerne ken tambe a yuda nan cu un beach cleaning y Club di Futbol La Fama.

Nan ta enfoca cu Savaneta tambe tin turismo pa ofrece fuera di lama, si den tempo nan lo logra verf 20 cas, segun Thijsen a sigura, esey por bira un tour y pa nan e colornan di cas ta importante pa keda yamativo, manera esun prome cu ya caba turistanan ta para y saca potret den e cas Savaneta 64 ubica band’i caminda.

Fundacion Savaneta Prome Capital a lanta pa e meta aki di preserva e balornan cultural historico y contribui na e desaroyo socio economico di Savaneta. Al final Savaneta tambe ta un atraccion turistico na Aruba unda su boutique hotelnan, restaurantnan, su lama y paisahe di seronan ta pone Savaneta ariba mapa mundial como un destinacion turistico.