A traves di un publicacion ariba su pagina di Facebook, minister di Transport, Integridad, Naturalesa y Asuntonan di Adulto Mayor, Ursell Arends a anuncia cu diamars 21 di mei e International Panel on Deltas Coasts and Islands (IPDC) a lansa e rapport tocante e estado di adaptacion climatico den deltanan, areanan costal y islanan, cu contribucion di tur e islanan den Caribe Hulandes.
El a indica cu e rapport ta un compilacion di contribucion activo di Aruba, Boneiro, Corsou, Sint Maarten, Saba y St. Eustatius. E rapport ta provee un analisis profundo di e desafionan climatico cu e islanan ta enfrenta, hunto cu strategianan y plannan relaciona cu adaptacion climatico.
E rapport, cu ta disponible riba e website di National Climate Resilience Council of Aruba, ta indica cu e delta-, costa- y islanan chikito ta particularmente vulnerable pa e impacto di cambio climatico. E areanan aki hopi biaha ta densamente pobla y nan ta di importancia crucial pa sociedad, economia y ecosistema.
Cambio di patronchinan di clima ta causando yobida mas fuerte, tormenta mas intenso, olanan di calor y sekia. E clima extremo aki y otro impactonan di cambio climatico lo aumenta presion riba e sistema di awa, empeorando e retonan cu ta existi relaciona cu awa y desasternan. E ta afecta ecosistema, salud, suministro di awa di cas, transportacion, produccion di energia y sector di economia, manera agricultura, turismo y industria.
E rapport aki ta remarca cu pa proteha sustento y preserva regionnan vulnerabel manera e delta-, costa- y islanan, ta birando cada bes mas cla cu medidanan di adaptacion ta necesario pa proteha e region- y paisnan di e impacto di cambio climatico.
A pesar di progreso den plan di adaptacion global, den financiamento y implementacion, e rapport ta señala, e esfuerso di adaptacion no ta mantene cu e risico di cambio climatico cu ta keda crece. E ta agrega cu ademas, e financiamento internacional pa adaptacion cu ta bay paisnan den desaroyo ta 10-18 biaha mas chikito cu e cantidad necesario, segun calculacionnan, creando un buraco den implementacion di adaptacion (United Nations Environment Programme, 2023). Pa preveni cu e buraco di adaptacion no ta sigui amplia, esfuerso robusto pa acelera accion di adaptacion ta necesario.
E International Panel for Deltas and Coastal Areas (IPDC) ta un iniciativa di prome clase di e gobierno Hulandes como un compromiso clave pa e Agenda Accion di Awa. IPDC ta un aliansa unico, uniendo gobiernonan, institucionnan financiero, expertonan cientifico y practicantenan di rond di mundo.
E rapport ta enfatisa cu e mision di IPDC ta pone awa na e curason di adaptacion climatico y ta contribui pa cera e buraco entre necesidadnan di adaptacion climatico y implementacion den e delta-, costa- y islanan.
Pa logra su obhetivo, IPDC ta usa un metodo basa riba demanda pa supera e barera di implementacion y fortalece e condicionnan cu ta facilita gobernacion, desaroyo di conocemento, capacitacion y accesibilidad na financiamento. Pa evalua su progreso den aceleracion di e implementacion di adaptacion, IPDC ta publica actualisacion regular riba su progreso.
E prome rapport di IPDC ta describi e desafionan unico y complica cu e delta-, costa- y islanan ta enfrenta y ta enfatisa e necesidad pa acelera e esfuerso di implementacion di adaptacion pa cera e buraco.
E rapport ta splica cu pa alinea e terminologianan y identifica bareranan comun di implementacion di adaptacion, a introduci e IPDC Guidance Framework. E ta describi e plan di adaptacion y e proceso di implementacion relaciona cu politicanan convencional den mayoria di e miembronan di IPDC den tres etapa fundamental. E prome etapa ta compronde e fase di plan strategico y ta describi paso- y elementonan clave den e proceso di plan strategico di adaptacion, e di dos ta encera consideracionnan clave pa priorisacion y plan di inversion, y e di tres ta delinea condicion- y bareranan comun pa implementacion di adaptacion.
E miembronan di IPDC ta participa activamente y ta comparti nan contextonan nacional di adaptacion den relacion cu e tres etapa di e IPDC Guidance Framework. E esfuerso colaborativo aki ta encera cu cada miembro ta contribui cu perspectiva di nan respectivo proceso di planificacion y implementacion di adaptacion nacional, incluyendo strategia di adaptacion, proceso di planificacion y inversion, y e factornan facilitador y bareranan pa implementacion.
Segun e rapport ta indica e barera comun di implementacion di e miembronan di IPDC ta relaciona cu falta di conocemento y falta di datonan pa informa e tumamento di decision, e complehidad asocia cu transicion di un enfoke sectoral na uno di gobernacion integra, capacidad institucional limita na varios nivel y accesibilidad limita na financiamento.
Basa riba e barera comun aki, IPDC tin como vision pa contribui na cera e buraco di implementacion di adaptacion usando un metodo basa riba demanda pa fortalece condicionnan facilitador relaciona cu desaroyo di conocemento, gobernacion apropia, fortalece capacidad y acceso na financiamento.
Aruba tambe a participa na e rapport aki, cual ta indica cu como un isla chikito cu un economia habri, Aruba ta altamente expuesto y vulnerable pa varios shock exterior, incluyendo, pero no limita na, shock financiero-economico y geopolitico, como tambe shock ambiental y climatico. Den termino di exposicion y vulnerabilidad di cambio climatico, e rapport ta señala cu Aruba ta expuesto na tanto shock climatico como kimamento climatico lento. Ademas e ta resalta cu volatilidad climatico y patronchi di clima extremo a aumenta durante e ultimo siglo.
Den su publicacion, minister Ursell Arends ta subraya cu segun Dr. Ryan R. Peterson, Presidente di NCRC Aruba, e programa di IPDC ta provee un caminda esencial pa delinea y combina esfuersonan, ambicionnan colectivo di resiliencia climatico, y na mesun momentonan uni e recursonan di scarsedad financiero y di conocemento entre e islanan.
“E lansamento di e proyecto aki ta un stap importante cerca paisnan den Reino Hulandes pa colabora pa un futuro cu resiliencia climatico y uno cu ta trata naturalesa na un manera responsabel,” e mandatario a remarca.
Por lesa mas di e rapport aki den nos edicion di mañan.
