E actividad di Baki den Bario a bira hopi popular den comunidad. Esaki ta e oportunidad pa e ciudadanonan por deshaci di nan desperdicio di cas di un forma completamente gratis. Desde cu dump na Parkietenbos a cera, e situacion di sushi rond di Aruba a bira hopi grave y lamentablemente te ainda, e problema ta keda persisti, a pesar di e esfuersonan di gobierno y otro institucion- y fundacionnan.

Baki den Bario ta un iniciativa cu ta forma parti di e campaña Limpi Limpi di gobierno. Parti di e meta di campaña nacional Limpi Limpi, ta pa conscientisa e ciudadanonan ariba e procesamento responsabel di desperdicio.

Baki den Bario a inicia den luna di september 2023 y a logra colecta 781 baki di desperdicio y a conta cu mas di 4,998 vehiculo cu a bin haci uso di e evento, sin conta e cantidad di vehiculonan cu a participa durante e prome actividad.

E actividad a cuminsa aceptando cinco diferente tipo di desperdicio basa riba e tipo cu mas tabata yega na dump Parkietenbos. Despues di e prome actividad na San Nicolas, a tuma decision pa pone baki apart pa taira y carton, a cuminsa acepta azeta di cushina usa y a cambia e orario pa un ora mas prome, for 7or di mainta te cu 11or di mainta.

Districto y localidad di e actividad ta basa riba e experiencia, pero tambe datos y experiencia di pasado, relatando na desperdicio produci den cada bario cual ta inclui cantidad di vivienda/famia den e bario.

Baki den Bario no ta habri pa desperdicio comercial, solamente desperdicio residencial y no ta acepta asbestos tampoco. Na algun ocasion a bin encontra asbestos, cual no ta ser acepta den e actividadnan di Baki den Bario. Esaki ta pa motibo cu asbestos tin companianan specifico cu tin permiso di DTI pa atende cu esaki cu normanan estricto cu e companianan aki mester sigui.

A pesar di e esfuersonan aki, un gran cantidad di ciudadanonan ta actua di forma iresponsabel y ta contribui na e sushedad cu tin rond di Aruba. Un cantidad di dumpnan ilegal a nace pa motibo cu ya no por a hiba nan desperdicio dump y no tabata kier paga pa tira nan desperdicio afo.

Na esaki por agrega tambe cu e prijsnan di containernan pa tira sushi afo no ta accesibel pa tur hende. E prijsnan ta varia depende di e tipo di sushi. Un container pa benta sushi residencial tin un costo di alrededor di 650 florin y container special pa tira desperdicio di construccion por costa alrededor di 1,050 florin.

Diasabra 25 di mei e siguiente actividad di Baki den Bario ta tuma luga y ta recorda tur ciudadano cu kier deshaci di nan desperdicio durante e actividad aki cu e sushi mester ta separa segun e tiponan di sushi cu ta ser acepta.