Luna Foundation y Crijojo Trappers Aruba tabata e dos fundacion cu tambe tabata presente den e caso di ayera na Corte di prome Instancia caminda a condena Alberto Groeneveldt pa negligencia di un bestia.
Zoey Conijn di Luna Foundation y Jacqueline Boderie di Crijojo Trappers ta e personanan cu mas tabata envolvi den e caso mirando cu nan ta esun cu a drenta den cas di Groeneveldt y bay cu Khaleesi y su puppiesnan ora e situacion di negligencia a bay asina leu na unda cu den un video y potret cu a bay viral por a mira con Khaleesi a keda. Lamentablemente e no por a wanta y a muri dia 31 di maart.
Ayera ora e caso a culmina Bon Dia Aruba a puntra tanto Conijn como Boderie kico nan tabata nan opinion tocante e sentencia caminda Conijn a sigura cu “nan a bay ataca mi fundacion y esey mi no ta acepta, Aruba is not a playing field cu nos tin cu rescata tur eyfo, cada maltrato Luna mester t’ey y door cu e no por a cuida su cachonan ta pa via di nos, “ el a sigura.
Asina mes, el a destaca cu cuido di cacho ta responsabilidad di cada doño di mascota “no di e fundacionnan cu ta nos trabou pa rescata nan tur no ta nos trabou, nos ta boluntario, mi por stima y duna tempo na loke nos ta haci pero pa critica nos y pa purba tira e culpa riba nos banda no, no ta bon.” Conijn a señala.
Riba e pregunta di otro medio si nan tabata conforme cu e sentencia di hues ken a duna Groeneveldt como castigo 60 ora di trabou comunitario, unda 20 di nan ta condicional y 750 florin di multa, Conijn a señala cu si nan si ta conforme cu esey.
El a duna como mensahe na comunidad “pa zorg miho pa bo mascotanan, no pone tur e trabou riba fundacionnan of tur e presion riba nos, nan ta bo mascotanan, ta bo responsabilidad, nos t’ey pa yuda unda cu nos por y con nos por, pero no pone tanto presion riba nos.”
Tambe nan a trece dilanti cu na momento e puppiesnan a ser rescata pa nan, nan tabata mustra den estado di abandono y desnutri, cu no tabata asina cu nan tabata den bon condicion manera Groeneveldt su abogado, Desiree Croes a señala den corte.
