FAVI ta presenta su proyecto pa ta mas cerca di comunidad y pa participa den e premio Appeltjes van Oranje

Fundacion Arubano di esnan Visualmente Incapacita (FAVI) ayera mainta a presenta oficialmente su proyecto social “Un Cop’i te” caminda nan tin e posibilidad pa gana e premio “Appeltjes van Oranje” di aña 2024 cu lo tuma luga na october di e aña aki y pa por logra esey mester ayudo di comunidad.

For di awe, comunidad ta bay tin e oportunidad di vota pa FAVI por haya e oportunidad pa pasa na final di e premio aki cu ta na luna october caminda tin 50 proyecto mas cu ta competiendo pa e premio prestigioso aki cu cada aña ta ser presenta pa Oranje Fonds door di proyectonan social excepcional.

E tema di “Appeltjes van Oranje 2024” pa e aña aki ta “Soledad nos ta combatie hunto,” esaki ta nifica cu e premio di 25.000 euro, ta dirigi na iniciativanan cu lo logra envolve hendenan activamente den un sociedad unda cu nan no ta ser lubida, y pa esey, FAVI ta menciona cu ta importante e labor cu nan ta haci cu nan clientenan “pasobra no ta facil biba sin por mira y bo so.”

Cu e proyecto “Un Cop’i te”, FAVI kier duna tayernan y training pa comunidad, nan kier involucra mas e hendenan dunando nan herment cu mester pa asina por yuda un familiar cu tin problema cu bista, “nos tin trabou pa haci y nos ta kere den trece back e importancia di duna tempo na bo ser keri, nos ta di opinion cu tur hende den comunidad tin nan rol pa asina mehora y yuda un persona cu limitacion visual sinti su mes parti di comunidad, na unda e por participa y socialisa,” Catherine Midi coordinador di actividad di FAVI a bisa.

Te dia 31 di mei por realisa e votacion pa FAVI via e website de www.oranjefonds.nl na unda nan ta desea e cooperacion di hendenan cu nan voto, pa nan por haya fondonan pa sigui yuda comunidad y engrandece nan servicio di Cop’i Te y haci comunidad mas cerca di nan, ademas di FAVI otro 9 fundacion den Caribe manera na Corsou, Sint Maarten y Boneiro ta competiendo pa ta un di e finalistanan di e premio Appeltjes van Oranje.

“Nos mester di comunidad pa yega na e clientenan, nos mester di henter comunidad pa yuda yega e cliente y asina nos por registra mas cliente cerca FAVI,” Sary Wernet-Kelly ken ta fungi como terapista di revalidacion a señala.

Manera ta conoci, FAVI ta fundacion encarga cu e guia pa persona nan cu tin un limitacion di bista, cu esaki nan ta referi na momento cu un persona cu a bira ciego pa motibo di un enfermedad of malesa di bista, ora un persona cu no ta mira skerpi y tin dificultad di mira cual ta strob’e di funciona independientemente, un persona cu ta preocupa cu e diagnostico di su bista, un baby, mucha, hoben of adulto por ser considera un cliente pa FAVI si e tin un bista limita cu ta strob’e funciona den su bida diario.

Ora un persona ta realisa cu e no lo mira mas ta isola su mes socialmente, tin poco apoyo y sosten social, nan ta keda sin tuma parti na reunionnan social of eventonan pa motibo di e miedo cu miembronan den e comunidad lo mira nan como “diferente” of trata nan diferente. Ademas, nan ta sinti miedo di ser stigmatisa loke por hiba e persona cu un limitacion di bista ta cera su mes y keda sin expresa su opinionnan personal of comparti su emocionnan, cual ta limite di interaccion social y ta isola su mes.

Pa e motibonan aki, nan a presenta nan proyecto cu nan lo duna na diferente gruponan di interes di comunidad manera boluntarionan di diferente organisacion, instancianan social cu ta atende cu diferente persona diariamente, na personal di salubridad como por ehemplo, cuerpo policial, ambulance, ayudo social, enfermeronan, dokternan y hasta prensa, pa asina por agrega conocemento y por yuda un persona cu limitacion di bista cu ta sinti su so.

Nan ta ofrece diferente tip practico tocante entre otro, adaptacion na cas, interaccion social, formanan cu ta yuda na keda den contacto cu e persona cu tin limitacion y medionan auxiliar, por medio di tareanan di simulacion lo haya e comprondemento di e situacion, con pa reconoce isolacion social cerca e persona cu limitacion visual y claro, e participantenan di e tayernan aki lo haya “Un cop’i te” manera e proyecto mes ta yama.

Nan ta haya cu prensa tin un rol importante den comunidad pa ta mas inclusivo, specificamente cu esnan cu ta visualmente incapacita caminda medionan social mester adapta nan noticianan pa e grupo aki tambe por haya sa kico ta sucediendo.

“E rol di media den comunidad pa e grupo meta aki cu ta personanan cu limitacion visual, por haci hopi pa asina yuda nan y bisa perde bista no ta algo asina erg ey, cu tin un comunidad eyfo cu ta consciente di e situacion di nan y cu nan tin caminda pa bay, si henter comunidad sa cu pasobra bo ta ciego esey kiermen cu bo mester ta na cas of un hende tin cu cuid’e 24 ora, 7 dia pa siman, no ta nifica esey pasobra e persona aki por sali for di cas, e por bay un gym, tur caminda, pero e comunidad mester ta habri y involucra cu nan ta forma parti di nos comunidad,” Wernet-Kelly a bisa na nos redactor cu manera potretnan ta mustra, tambe a haya un tayer cortico di e proyecto aki.

Ademas, recientemente FAVI a cambia su logo unda e color preto no t’ey mas y awor a duna bonbini na color blauw pa ta mas inclusivo, pa cambia e pensamento cu FAVI ta pa hende sordo of cu no ta scucha y esey ta e motibo di pakico nan a haci e cambio aki, pa hendenan sa cu nan servicio ta mas amplio.