Alberto Groeneveldt ken tabata e doño di cacho miho conoci como “Khaleesi” ta bay ta na corte di prome instancia pa 8.40 am caminda e ta acusa di “a intencionalmente haci un bestia dolor y/of causa un cacho herida y/of a perhudica salud di e cacho manera e rol di Ministerio Publico ta indica.

Ministerio Publico ta señala cu Groeneveldt G. ta wordo acusa di den e periodo di prome di januari 2024 te 26 di maart 2024, varios biaha y sin ningun meta y surpasando tur loke ta permiti, a intencionalmente haci un bestia (un cacho di nomber Khaleesi) dolor y/of causa e cacho herida y/of a perhudica salud di e cacho, door di laga e cacho pa tempo largo mara na un cadena demasiado cortico y inadecua y/of a keda sin duna e cacho e cuido necesario, door di keda sin duna e cacho cuminda y/of awa pa e bebe y/of cuido pa su heridanan y/of remedi.

E ta wordo acusa di varios biaha, den e periodo di prome di januari 2024 te 26 di maart 2024, como doño di un of mas cacho, a keda sin cumpli cu su obligacion di duna e cacho(nan) aki e cuido necesario, dor di duna e cacho(nan) insuficiente cuminda y/of di duna e cacho(nan) insuficiente awa y/of di keda sin duna e cacho(nan) cuido medico necesario di un veterinario y/of di keda sin duna e cacho(nan) suficiente espacio pa nan move.

Dia 27 di maart, a traves di un potret hopi sensitivo di Luna Foundation Aruba Inc. Aruba a conoce un caso di maltrato di bestia cu a bay viral unda tabata ilustra e situacion di un mama cacho y su puppies.

A bira conoci door di su doño mes, Groeneveldt, cu e cacho no tabatin mas cu dos aña y cu su nomber tabata “Blaky,” E autopsia cu a wordo haci pa veterinario Contreras, tabata hopi precies y tambe lamentabel, “e principal hallazgo tabata di dos buraco, un den su luchtpijp y slokdarm di varios centimeter, ambos a wordo produci door di e morto di e tehido provoca pa e presion di e cadena riba e organonan, structuranan a inflama debi na infeccion,” e documento ta señala.

“Su pulmonnan tambe tabata inflama y cu hemoragia, debi na un neumonia causa a traves di e buraconan di e luchtpijp y slokdarm. Su musculonan tabatin falta di desaroyo, tabatin desnutricion extremo y infeccionnan, su otro organonan no tabatin un aspecto abnormal, excepto esnan cu tabata bleek.”

Esaki por considera como e muestra cu e negligencia cu e cacho no a tuma luga pa par di dia so sino pa basta tempo.

Riba medionan social, ya caba a publica cu e caso ta bay tuma luga awe 8.40 di mainta caminda varios organisacion defensor di bestia por ta presente.