Manera ta conoci e Departamento Meteorologico di Corsou a adverti e pueblo di Corsou pa keda alerta ariba posibel mal tempo na e isla. Despues di mira e imagennan ariba rednan social, por a constata cu e mal tempo aki por afecta Aruba tambe y hopi a cuminsa cuestiona pakico Meteo Aruba no a avisa nada tocante e situacion.

Mientras cu pueblo di Corsou ta en espera di mal tempo, ariba rednan social hopi a puntra pakico Meteo Aruba no a informa comunidad nada tocante e posibilidad cu Aruba tambe lo ricibi mal tempo. No ta prome biaha cu pueblo ta cuestiona e trabao di Meteo Aruba y ta expresa nan desconfiansa ariba e exactitud di e boletinnan di tempo cu nan ta emiti.

Te cu ayera tardi pa 1:30 di atardi Meteo Aruba a publica un actualisacion di tempo den cual nan ta indica cu e tempo te cu ayera nochi lo ta variablemente nubla cu un awasero local. Den marduga y awe mainta tambe shelo lo ta variablemente nubla cu algun awasero local cu por wordo compaña pa strena cu lamper.

Pa loke ta e situacion general di tempo, Meteo Aruba a indica cu un disturbio den nivelnan mediano y mas halto di atmosfera ta treciendo humedad y instabilidad den e region local. Esaki lo por ocasiona algun awasero local fuerte cu por causa molester y esaki por wordo compaña pa lamper y strena.

Meteo Aruba a informa tambe cu stof di Sahara den un concentracion leve lo stroba visibilidad un poco y por trece aire di calidad abo. Nan a adverti na personanan cu alergia y problemanan respiratorio pa tene esaki na cuenta.

E departamento a emiti un alerta pa boto chikito cu ta drenta na vigor pa partinan oost te noordwest di e costa di Aruba. Nan a adverti tambe ocupantenan di boto chikito pa no bay den of cerca di e areanan cu tin awasero fuerte, strena of lamper cu lama lo bira basta bruto.

Di nan banda Aruba Weather Watch a publica ariba cuenta di Facebook imagennan di loke nan a ricibi for di Departamento Meteorologico di Corsou, cual segun mamm ta indica, riba nan website Departamento Meteorologico di Corsou no tin poni ningun caminda cu tin alerta di mal tempo.

Te cu ayera no tabatin ningun advertencia ni ningun alerta pa Aruba en general pa loke ta trata mal tempo. Pueblo ta en espera pa si esaki ta bay tuma luga of no, mientras cu algun hende ta prepara riba nan mes pasobra nan no tin confiansa mas den Meteo Aruba.