(JamaicaObserver) – Un sugerencia di e prome minister Andrew Holness cu Jamaica mester tin su mesun corte di apelacion final ta wordo mira como un accion imprudente pa un abogado cu experiencia.
Holness, cu a aparece den e programa di television di mainta na CVM, At Sunrise, a bisa e hostnan Yendi Phillips y Dennis Brooks cu su partido ta kere firmemente cu “nos corte final di apelacion mester ta un corte final na Jamaica.”
Sinembargo, el a bisa cu e proceso pa dicidi riba un corte final di apelacion pa Jamaica mester pasa den e “proceso di un referendum indicativo.”
“E hende mester tin un palabra den e asunto, esey ta number uno pa nos. Y di dos, si nos tin un corte final pa repatria, e no mester bay Port-of-Spain, e mester bin Kingston. Esaki ta nos posicion,” Holness a bisa diadomingo, mientras el a reconoce cu Jamaiquinonan por vota pa tin e Corte di Husticia di Caribe (CCJ).
Port-of-Spain, Trinidad, ta caminda e Corte di Husticia di Caribe (CCJ) tin su sede.
E sugerencia no a bay bon cu e abogado veterano Lloyd McFarlane cu a cualifica e posicion como “preocupante” y un indicacion claro cu e Partido Laborista di Jamaica no tin intencionnan serio di bandona e Privy Council na Inglatera pa e CCJ.
“No ta prome biaha cu nos ta tende esaki wordo expresa pa un lider di e Partido Laborista di Jamaica. Mi ta kere cu Sr. Bruce Golding, lider anterior di JLP, algun aña pasa realmente a lansa e idea, y den e tempo ey mi tabata un di e personanan cu a responde. Den e tempo ey e no tabata un proposicion viable y e ta keda no viable awendia pasobra Jamaica no tin e structuranan na luga pa sostene un corte final di apelacion aworaki,” McFarlane a argumenta.
“E recursonan cu a ser poni disponibel pa nos cortenan durante hopi aña nunca no tabata suficiente pa haci e trabou cu ta necesario; esaki ta e motibo pa e retrasonan serio cu nos ta experenciando tur e tempo aki. Y e placa cu ta necesario pa pone structuranan na luga pa un corte final, na e momentonan aki, ta mas miho usa pa simplemente mehora e sistema di corte cu nos tin actualmente,” el a bisa adicionalmente.
“E posicion cu e prome minister ta tuma na e momentonan aki ta preocupante pasobra loke esaki ta nifica ta cu, si e asunto mester bay un referendum, e voto lo ta politisa. Esey lo ta lamentabel pasobra, ban ta honesto, e votadornan Jamaiquino no ta completamente bon educa den e asuntonan aki y lo ta vota segun liñanan di partido y no necesariamente den interes di Jamaica mes,” McFarlane a agrega.
Segun e abogado cu experiencia, un movecion pa haci e CCJ e corte di apelacion final lo ta mas logico legalmente.
