Mirando e cantidad di propaganda cu Gobierno Di Aruba ta haci pa promove Hotel Secret’s na Sero Colorado, cu segun un comunicado oficial di gobierno a anuncia cu pa fin di 2024 nan lo kier keda cla cu e construccion di e prome 300 camber y habri esakinan prome cu aña caba, sinembargo, den 1 di 2 bouwaanvraag cu ta existi nan cu e mesun number 0994-2019 ta destaca cu e hotel aki ta bin cu su propio septic tank.

Marlon Croes Director DOW na hues
 Den un di e 30 caso cu a tuma luga den Corte entre ciudadanonan afecta cu e proyecto contra Gobierno di Aruba, specificamente esun di dia 6 di december 2023 director di DOW a sorpresa tur hende den corte unda a declara na honorabel hues Sander Landhage cu ta bay bin un tuberia cu lo conecta Secret’s Hotel ubica na Sero Colorado riba RWZI na Zeewijk.

Bon Dia Aruba su fuente den DOW a leak un rapport di e plan cu ta pa “Improvement Sewer System at Former Lago Colony Area.”

Costo di e proyecto y di cua minister e placa lo sali
 E proyecto su costo a wordo prepara pa DOW unda cu lo traha 3 pumphuis y tuberianan lo tin un costo di 3.995.189 miyon florin pero no ta ilustra den e rapport for di cua minister su presupuesto e placa aki ta bay sali, si ta di prome minister Evelyn Wever Croes of minister di Naturalesa Ursell Arends ken tin RWZI bao su maneho of lo warda e privatisacion y laga Utilities Aruba N.V financia e proyecto di tuberia pa conecta e Hotel Secrets Aruba riba RWZI cu lo mester habri dia 1 di december 2024 manera e rapport ta indica.

Aanlegvergunning pa e proyecto di tuberia
 Tambe mester tin un aanlegvergunning pa e proyecto di tuberia por pasa mirando e ley di naturalesa, ya cu no por duna un aanlegvergunning sin un ontheffing di minister di Naturalesa.

Bon Dia Aruba ta bin investigando e rapport di DNM di e tuberia aki, mirando cu ya den gobierno anterior bao ex-minister Otmar Oduber, director Gisbert Boekhoudt di DNM tabata tin conocemento di hecho castigabel unda hasta el a pone den un advies cu a rosa flora y fauna prohibi, sin aanlegvergunning sin un ontheffing y e no a meld esaki na Ministerio Publico. Tampoco no por contesta si a traha un process-verbal unda e tin un obligacion di haci’e.

Tambe Bon Dia Aruba ta bezig cu director interino di DIP, na unda ta investigando cu a base di un aanlegvergunning cu ta riba un MB (Ministeriële Beschikking) tin un situatietekening cu nomber di director di DLV patras di e documento aki, na e momento ey e tereno pa e situatietekening aki no tabata existi.

Tampoco ta forma parti di e acta notarial cu ta poni riba e MB unda director di DLV tambe ta na altura di esaki y a acepta cu e documento di e MB specifico aki, berdad no ta parti di e acta notarial segun un entrevista di dia 12 di maart 2024 cu redactor di Bon Dia Aruba a tene na DLV.

Den e caso di e MB aki atrobe, a rosa flora y fauna protegi den mas di 10.000 meter cuadra sin aanlegvergunning y sin un ontheffing.