Gobierno no por percura… Pa mantencion ni planificacion…

Den e dianan aki nos ta keda confronta cu e problemanan di gobernacion fayando den tarea clave: mantencion y planificacion. E casonan di maneho di desperdicio, suministro di awa y coriente y procesamento di awa sushi ta parce di tin un cita cu otro pa cuminza ataca comunidad na mesun momento. E causa di e situacion aki ta e maneho deficiente di gobierno actual, pasobra nos tin siete aña caba bao di e gobernacion aki, unda a pasa den hopi intervencion den e structura di maneho y administracion di awa y coriente, sin cu a mira algo cambia. Publico por a presencia varios cambio den dirigencia di tanto WEB como Elmar, y di e compania ‘madre’ Utilities, pero naturalmente ningun hende por sa algo mas di loke realmente tabata tuma luger na nivel di planificacion pa futuro.

Claro cu nos por a scucha o lesa, completamente den e estilo di ‘roadshow’ di e gobierno aki cu ‘nan ta bay haci cos’ pero como cu e operacion mes di e actividadnan aki ta ser haci manera ta trata di un servicio secreto, si nos ta kere e ministro awor den loke e ta declara den e dianan o laga, esey no ta haci ningun diferencia. E mandatario concerni por bisa awor cu e ta “exigi solucion” di e companianan envolvi, pero cu esey ni e mes, ni e companianan a contesta e pregunta clave: con por ta cu no a haci e inversionnan necesario na tempo pa e problemanan di falta di suficiente capacidad no sucede? Por ta cu e companianan a keda na soño depues di e caida (leve) di consumo di awa y electricidad na 2020 pa via di e crisis di Covid-19? En berdad tabatin menos produccion y consumo, pero inmediatamente despues di e crisis Aruba a cuminza bin back riba pia. E cifranan suministra pa e companianan mes ta indica cu na 2022 caba tabatin casi 2.000 conexion di coriente mas cu na 2019. Conta acerca e aumento cu por a anticipa pa e hotelnan cu ta bay habri awor, plus e miles di trahador extra cu mester bin di exterior pa traha eyden y bo sa suficiente. No ta e mesun ministro aki cu a bin alerta nos cu tin 9.000 cupo di trabao pa cual Aruba no tin trahador, cu ta responsable pa a premira cu aumento di capacidad di electricidad y awa mester haya prioridad halto? Si acaso e companianan no tabatin ningun nocion di loke nan tabata haci, no tabata tarea di e ministro y su conseheronan pa alerta nan? Nos mester conclui cu e mandatario tabata na soño tambe, hunto cu e companianan? Pakico a yega den pasado riba e tremendo idea cu mester a bin un empresa supervisor riba e empresa di produccion di awa y electricidad, y esun di distribucion di coriente, si ta resulta awor cu e compania vigilante tampoco tabata capaz di duna guia na planificacion? E conclusion mester ta anto cu awor tin un structura di supervision inutil, cu no sa opera hustamente riba e terenonan primordial, cu ta planificacion y liga na esaki percura pa debido mantenimento y expansion di produccion y servicio? Mester yega na e conclusion cu e structura di supervision inutil aki ta sirbi solamente pa staciona ‘hende di confianza’ di e partido na mando, pasobra ta obvio cu nan ta incapaz pa eherce e trabao pa cual nan a ser nombra? Anto awor gobierno a yega ademas na e tambe ‘tremendo’ idea pa pone e empresa estatal nobo, cu mester bay renoba y administra e plantanan di purificacion di awa sushi, bao di halanan di e mesun compania supervisor aki, cu den nos cara ta duna prueba di nan ineptitud pa guia maneho di e companianan subordina? E mandatario concerni awor por bisa cu e ta desea di mira accion, y rapido, pero ta ken mester haci esaki? Nos a mira un rueda di prensa bastante bergonzoso di dirigencia di Elmar, unda e falta di mantencion a bin dilanti, pero banda di nan probable incapacidad pa maneha esaki, mester pone nan responsable pa un compania cu pa cada gasto mayor, riba Afl. 200.000,- si nos ta bon informa, segun nan estatuto mester e ‘visto bueno’ di gerencia di Utilities? Ta ken ta responsable anto pa pone inversion cana, y na tempo?

E situacion actual ta haci nos corda un suceso di mas di un decada pasa, unda un comisario di WEB tabatin un conversacion cu un miembro di redaccion di e medio aki. E comisario tabata conta cu e problemanan financiero di e tempo ey tabata debi na e hecho cu e compania a haci algun inversion paga for di cashflow, envez di bay fia placa pa esey. E tabata conta esaki como algo supuestamente comico, pero ora e redactor a puntr’e si no ta e como comisario tabatin e responsabilidad pa para e accion ey, pakico otro bo tin un hunta di comisario, e conversacion a termina abruptamente… Kico nos kier señala cu esaki? Cu e falta di vision y falta di conocimento por ta un problema na pia di trabao, pero mas grave ta cu regularmente nos ta haya señal cu na nivel maximo di dirigencia, aparentemente tampoco esnan responsable tin un nocion di kico realmente nan mester haci, cu e conscuencianan manera nan ta sali na cla awor: problema di desperdicio sin solucion, parque solar cu ta putri bay, red di coriente sin mantencion y planta di purificacion cu ta cay den otro. Goberna ta mas cu tene ‘roadshow’ so…