Durante Minister Glenbert Croes su rueda di prensa atendiendo e tema di instabilidad di coriente, e mandatario a confirma di a reuni cu e companianan estatal WEB, ELMAR, Utilities y otro instancianan cu e no tabata kier a divulga, pa inicia un investigacion interno den ELMAR. Den cuadro di e investigacion aki a contrata e compania Americano MPR di Washington DC.
Segun un comunicado di gobierno, MPR ta un compania cu ta specialisa den e ramo aki cu ta investiga, identifica e problemanan y indica kico ta e solucionnan y con pa ehecuta esaki cu efectividad.
Manera priminti, MPR a yega Aruba y a inicia su investigacion.
Pa e mandatario e baymento di coriente aki ta inaceptabel y ta convivi cu e disgusto reinante den nos pueblo. Nos ta un pais avansa y desaroya por lo cual e interupcionnan aki ta inaceptabel.
Mester remarca tambe si cu pa decadanan no a inverti den e planta y red di ELMAR. Durante Gabinete Wever Croes bou di e Minister di Energia Evelyn Wever Croes, a acorda un plan di mantencion y inversion di 5 aña. COVID a bati na nos porta cu a caba di debilita e estado financiero di nos companianan estatal di Utilidad. Pero asina mes den Gabinete Wever Croes 2, a acelera e proceso di mantencion y inversion di 5 pa 3 aña cual obviamente tampoco ta suficiente pa sigura un distribucion di coriente stabiel.
“Esaki ta e motibo cu mi a duna instruccion na Utilities N.V. pa inmediatamente contrata e compania MPR pa nan bin Aruba haci e investigacion, presenta e plan di accion, ehecuta esaki inmediatamente, pa asina sigura un suministro di coriente stabiel cu nos pueblo ta paga p’e mensualmente”.
Asina cu e investigacion ta cla lo comparti e informacion aki cu pueblo di Aruba pa mantene nos conciudadanonan informa, segun e comunicado ta finalisa.
