(AP) – Tur cos a cuminsa cu movecionnan di pia, pasonan fuerte padilanti y patras, na ritmo di musica Brasilero funk.Despues a adopta pasonan di break dancing, samba, capoeira, frevo y tur loke tabatin rond.
Passinho, e estilo di baile crea den aña 2000 pa muchanan den Rio de Janeiro su favelas, a ser declara den maart un “herencia cultural” pa legisladonan den e estado di Rio, treciendo reconocimento na un expresion cultural cu a nace den e barionan di ingreso abao.
E creadornan di Passinho tabata muchanan hoben cu hopi flexibilidad y ningun problema den nan wesonan. Nan a cuminsa purba pasonan nobo na cas y despues demostra esaki na fiestanan funk den nan comunidadnan y crucialmente, comparti esaki riba internet.
Den e dianan di comienso di rednan social, e hobennan tabata publica video di nan pasonan mas recien na Orkut y YouTube y e estilo a cuminsa plama na otro favelas. Un escena competitivo a nace y hobennan a copia y sina di e miho bailarinnan, cual a causa cu nan a sigui innova y lucha pa keda den posicionnan top. “Passinho den mi bida ta e base di tur loke mi tin,” bailarin y coreografo Walcir de Oliveira di 23 aña a bisa den un entrevista. “E ta unda mi ta logra genera un ingreso p’ami y mi por mustra hende mi felicidad ademas di baha stress, bo ta compronde? E ta unda mi ta sinti mi mes contento y bon.”
Productor Brasilero Julio Ludemir a yuda captura e spirito aki y descubri talentonan pa medio di organisa “bataya di passinho” den comienso di aña 2010. Na e eventonan aki, e hobennan tabata tuma turno ta demostra nan pasonan dilanti un hurado cu ta scoge e ganadonan.
E festival “Out of Doors” na New York su Lincoln Center a anfitriona un duelo di e tipo aki, dunando un audiencia Mericano un bista di e pasonan pasiona aki. Passinho a crusa frontera di e favelanan y a desconecta di e fiestanan funk cu hopi biaha ta asocia cu crimen. Bailarinnan a cuminsa sali riba television y a haya atencion durante e ceremonia di apertura di Weganan Olimpico na aña 2016.
Ludemir ta describi e estilo como un expresion di Brasil su “antropofagia,” e concepto modernista di tuma elementonan di otro cultura pa crea algo nobo. “Passinho ta un baile cu ta absorbe referencia di tur baile. E ta un mescla di e influencianan cultural cu muchanan ta absorbe mientras nan ta conecta cu mundo via rednan social den internet cafe,” el a splica.
Bailamento tambe a bira un manera pa e hubentud por move di comunidad pa comunidad controla pa gangnan di droga rival. El a ofrece e hobenna di favelas un caminda nobo pa cana cu no ta un bida di crimen of e sono di bira un atleta di futbol.
Passinho a keda declara un herencia pa Rio su asamblea legislativo via un ley cu Legislado di Estado di Rio Veronica Lima a propone. El a keda aproba unanimente. Den un delcaracion, Lima a expresa cu ta importante pa “descriminalisa funk y expresion artistico” di nos muchanan di favelas.
Ludimir ta bisa cu e reconocemento aki ta fortalece e prome generacion di bailarin di passinho como un inspiracion pa e hubentud di favelas.
Entre nan, Pablo Henrique Goncalves, un bailarin ocno cimo Pablinho Fantastico cu a gana un bataya di passinho den 2014 y despues a crea e grupo yama OZCrias, cu 4 bailarin cu a nace y cria manera su persona na Rocinha, Rio su favela mas grandi. E grupo ta gana placa bailando na festivalnan, eventonan, teatronan y programanan di television y nan a duna un bon bini na e reconocimento.
