Comunidad mester ta mas alerta pa ola di calor, specialmente adultonan mayor

Diferente medio di comunicacion internacional ta batiendo alarma pa un ola di calor cu ta tumando luga den area di Caribe, caminda e sensacion di calor por yega hasta 50 grado, loke por resulta peligroso pa personanan cu ta traha of haci actividadnan den aire liber.

Pa esaki, minister di Naturalesa y Asuntonan di Adultonan Mayor, Ursell Arends tambe a manda un comunicado di prensa dirigi pa adultonan mayor, indicando cu ola di calor ta peligroso pa adultonan mayor. “Como minister di Naturalesa mi ta sali for di e punto di bista cu cambio climatico ta un realidad,” minister Arends a bisa, indicando cu Nacionnan Uni a confirma cu 2023 a kibra tur record mundial pa loke ta temperatura halto, no obstante cu 2023 a cumpli 10 aña consecutivo di aumento di temperatura.

Aunke gobierno no por trece cambio den temperatura mundial, mester haci tur esfuerso pa mitiga e impacto di esaki riba esnan mas vulnerabel. Pa e motibo aki minister Arends a yama un reunion di urgencia cu diferente instancia cu ta atende di un of otro forma cu adultonan mayor.

Segun a informa, e meta di e reunion tabata pa nan hunto cu tur instancia yega na un plan di accion y cooperacion.

“Tur esnan cu ta atende cu adultonan mayor mester traha hunto pa evalua e peligro y prepara un plan con pa mitiga esaki.”

Investigando riba internet a logra haya datonan cu ta indica cu entre 1999 y 2019, mas di 150.000 morto rond mundo tabata relaciona cu ola di calor cada aña, segun un estudio reciente publica na PLOS Medicine’ por Yuming Guo di Universidad di Monash, Australia, y su ekipo.

Den studio aki, investigadonan a utilisa datonan di e Red di Investigacion Colaborativo Multi-Country Multi-City (MCC) cu tabata inclui mortonan y temperatura diario di 750 luga na 43 pais. Durante temporada calido for di aña 1990 te cu 2019, exceso di fayecidonan relaciona cu ola di calor a representa 153.078 morto pa aña, un total di 236 morto pa cada dies biyon habitante of e 1% di e mortonan mundial.

Asia y Europa ta e continentenan cu mayor cantidad di morto pa cada miyon habitante, e luganan cu mayor tasa di morto pa ola di calor a registra den areanan di clima seco.

Ola di calor of tambe yama “heat wave” ta periodonan di temperatura extremadamente halto cu ta dura poco dianan, loke por causa un stress termico pa e curpa humano.