Un di e factornan mas halto den costo di bida ambos den un manera directo y indirecto ta e prijs di coriente. Nos ta paga directamente tur luna pa nos uso di coriente. Esaki tambe ta e caso pa empresarionan cu ta reken door e costo halto di coriente den prijs di nan productonan cual nos ta paga pe den manera di inflacion.
Den e resumen cu a sali algun siman pasa di WEB N.V., nos por nota cu solamente 0.6% di e generacion di energia ta bin di fuentenan di energia solar. Bezig ta wak cu Aruba ta isla bendiciona cu solo, y cu nos prijs di coriente sumamente halto, mi ta puntra mi mes dicon nos no ta usando mas energia solar.
Utility-Scale Solar Panels: Solamente 10 Euro Cent pa Watt
Nos por nota cu 2 siman pasa e fuente PV Magazine a publica cu riba nivel di proyectonan di escala utility e prijs di e panelnan solar di mas nobo a yega e prijs di menos cu 10 Euro cen per Watt. Awo cu calculacionnan nos por conclui cu por produci energia via fuente di panel solar na nivel di utility pa un prijs cu ta mas cu 75% mas barata cu e tarifa actual di coriente. Imagina ki impacto esaki lo por tin pa nos isla si en berdad nos por baha prijs di coriente cu 70%+? Con e lo ta un alivio financiero directo y indirecto pa pueblo di Aruba.
Airco Zuinig & Verf Anti-Infrarood:
Si nos combina esaki tambe cu un subsidia pa modernisa tur sistema di airco na Aruba pa ehemplarnan mas zuinig y verf anti-infrarood. Compara cu airconan di 7 aña pasa, e airconan actual ya caba ta alrededor di 30% mas zuinig usando e sistema di SEER ratio. Un airco cu rating di SEER21 ta costa mas o menos 800 florin awo na Aruba, cual lastimamente pa hopi na Aruba, ta un inversion hopi grandi. Pero door cu e ta un inversion cu lo spaar coriente, e lo ta un bon idea si un Gobierno na Aruba subsidia pueblo pa inverti den airconan mas nobo y zuinig pa un bes mas corta e uso y prijs di coriente.
Un delaster pensamento por ta pa laga verf tur dak na Aruba cu no tin solar panel riba nan cu verf special anti-infrarood cu lo refleha e luz cayente di solo y haci un camber mas fresco di su mes. Tin experimentonan cu ta mustra cu e tip aki di pinta dak cu e verf anti-infrarood por haci un camber mas cu 5 grado Celsius mas fresco riba su mes. Dus esaki un bes atrobe lo corta e uso di coriente y yuda pueblo y empresarionan spaar riba nan cuentanan mensual.
Pa no bin cu sistema solar na nivel di utility na Aruba of cu un subsidia pa panel solar na nivel priva den mi opinion ta constitui un crimen contra pueblo di nos pais. Nos por ya caba cu tecnologia actual spaar tanto placa y brinda alivio directo mañan mes. Pero manera nos ta wak na Aruba dor di agendanan secreto e cosnan sumamente bunita aki simplemente no ta tuma lugar, cual nos como pueblo ta paga e prijs pe.
