Diamars ultimo den un conferencia di prensa dilanti Censo, partido AVP a trece dilanti e intencion cu nan tabatin cu un amienda presenta na Parlamento pa por cambia e ley electoral; pero esey no a tuma lugar pa falta di apoyo di otro fraccionnan.

Ora pueblo ta duna su voto den un urna electoral, esey ta ser certifica. Na aña 2021 mas di 3.000 ciudadano a entrega un firma pa un reconteo di un eleccion unda tabatin 900 voto invalido y centenares di e votonan aki tabata di partido AVP, segun lider di partido AVP, Mike Eman a sigura.

E tempo ey, urnanan a considera cu e voto ta invalido ora e voto a sali cu un “tiki” for di e ronchi; mientras cu tabata falta 54 voto y e resultado di eleccion lo tabata otro, totalmente diferente. “No 9 pa MEP y 7 pa AVP, pasobra e diferencia entre AVP cu MEP tabata hopi chikito. Pa 54 voto, e lo tabata 8-8 y 3.000 ciudadano den tempo di 72 ora despues di eleccion a bin akinan cu un documento cu firmanan pa entrega y pidi un reconteo,” Eman a bisa.

E tempo ey, presidente di Conseho Supremo Electoral, Glenn Thode a nenga pa e conteo tumar luga loke a causa un duda hopi grandi, lagando un mancha riba e resultado di eleccion, segun Eman ta indica.

Dialuna ultimo, fraccion di AVP a entrega un amienda den cual nan a pone cu na momento cu tin un disputa riba resultado di eleccion, of na momento cu den pueblo tin un incertidumbre pa resultado di eleccion pa motibonan valido, e ora tin un proceso pa disputa resultado di eleccion. No por bay over na kima of destrui stempeljaar, locual a sucede.

Tambe den proceso electoral di 2021, segun Eman ta indica, ta contrario na locual ley electoral tabata bisa, cu tur partido tin derecho despues cu nan lista a ser certifica, un siman despues, 7 di mei y 14 di mei partidonan tabatin e derecho a haya e kiesregister pa por cuminsa controla e proceso electoral.

“Tempo ey, Sra. Evelyn Wever-Croes di Gobierno Wever-Croes a dicidi cu no ta bay duna e kiesregister mas enpugna cu e ley cu ta bisa cu tur partido tin derecho ariba e kiesregister. Nos a bay e ora ey na un apelacion, prome na Conseho Supremo Electoral y e mesun persona Thode a dicidi cu nos no ta hayele. E ora ey a bay Corte, anto dos dia prome cu eleccion nos a gana e caso, caminda Corte a bisa cu mester duna e kiesregister cu e nombernan di esnan cu a vota. Y kico Censo a haci e tempo ey? Nan a interpreta e vonnis cu e nomber no ta sali sino e fam. Kiermen si un persona di fam Croes ta vota, ta sali su fam so y nos tin como 200 Croes den un urna electoral y e ora bo no sa ni por controla e pugna cu e spirito y e deseo di e ley pa controla procesonan electoral,” Eman a señala.

Igualmente el a bisa cu pa via di amienda aki, pueblo mester ta cla y prepara pa controla e urnanan electoral, pa motibo cu dialuna mainta, ora nan a entrega e amienda na Parlamento di Aruba unda e parlamentario di MEP, Hendrick Tevreden a bisa cu e tin simpatia pa e amienda, y e ta mira cu e ta hopi importante pa por controla un eleccion y pueblo por tin trankilidad, toch despues a dicidi di no vota pa e amienda.

Pa e motibo ey, Eman a anuncia e creacion di e dia “V”, cual ta e dia di eleccion caminda nan ta bay controla e voto, pa controla pa e boluntad di pueblo sali bon conta. “Y nos lo bay percura pa e victoria pa e dia V no wordo horta e biaha aki, pasobra ora nos scucha den e senonan di e propio partido MEP, tin un disputa interno ariba e votonan di Sra. Evelyn Wever-Croes. Kiermen un duda cu logicamente tin cerca partido AVP, pero tin un duda completo ariba e resultado di eleccion di 2021, pa cual nos ta bisa cu mester tin un control nacional. Y nos ta haci un apelacion na pueblo pa desde awe nos cuminsa organisa e dia V pa nos controla e voto y controla boluntad di pueblo. E dia V ta bira e dia nacional caminda Aruba ta bini hunto pa sigura e liberacion di e pais aki for di Gabinete Wever-Croes, cu tin e comunidad aki strangula. Y diasabra awor den Cas di Partido ta bay cuminsa e organisacion di e dia V ” Eman a finalisa.

Nan tambe ta bay pidi pa observadornan internacional ta na Aruba, pa sigura cu locual a sucede den ultimo eleccion, nunca mas lo ripiti, manera el a expresa.

Parlamentario Mervin Wyatt-Ras a señala cu a bin cu cambio den articulo 10, unda cu Gobierno aworaki ta corona locual cu a nenga nan e tempo ey, ora cu fraccion y partido AVP a pidi mas informacion pa asina nan por controla y haci e chekeo na diferente urna. Y e ora ey a nenga di duna informacion, solamente e fam y no e nomber. “Eynan bo ta mira kico tin di sconde? Ta usa articulo 8 di EVRM (Europees Verdrag voor de Rechten van de Mens) como argumento pa asina proteha privacidad di ciudadanonan, sinembargo, na momento cu un minister mester di informacion pa haci su trabou e ta haya informacion for di e registro akinan,” el a bisa.

Di su parti, Wendrick Cicilia a splica cu dialuna ultimo den sala di parlamento a trata e cambio di e ley electoral “Kiesverordening” na unda algun cambionan minimal a tuma lugar, pero e cambio di mas impactante segun su persona, ta e hecho cu organisacion y partidonan politico no por ricibi e kiesregister mas. “En cambio nos mester tene na consideracion cu gobierno si tin e informacion aki na su disposicion. Y cualkier partido politico cu ta participa den eleccion tin un desbentaha, pasobra tin un bentaha di informacion ariba tur otro organisacion politico cu ta participa den e proceso electoral. Esaki ta un desigualdad di participacion den un proceso electoral,” el a señala.

E proposicion di cambio di ley cu AVP a trece dilanti na sala di parlamento Cicilia a splica cu ta netamente “pa cera e porta y e bentana pa e gobierno aki usa institutonan pa perhudica organisacionnan politico.”

Nan a propone pa incorpora un garantia cu ta “salvaguardia transparencia y integridad di e proceso electoral pa garantisa cu na momento cu tin duda den resultado esakinan por ser exponi” den e caso aki nan a expone un articulo nobo den e ley electoral (84a) e cual ta indica cu na momento cu tin duda den conteo di voto of con nan a declara un voto invalido of no, cu por tin consecuencianan grave pa reparticion di asiento of por influencia resultado di un eleccion automaticamente Conseho Supremo Electoral mester duna e opdracht pa asina por revisa tur e carchinan di votacion pa determina kico realmente tabata e boluntad di comunidad di Aruba.